यातील पहिली घटना कळमेश्वर पोलिस ठाण्याच्या हद्दीतील येतरी परिसरात समोर आली. रुचिका राजेश भांगे (वय २१, रा. वेलकम सोसायटी, बोरगाव) असे मृत तरुणीचे नाव असून सौरभ शिवदास जामगडे (वय २६, रा. कळमेश्वर) असे आरोपीचे नाव आहे. आरोपी घटनेनंतर फरार झाला असून त्याचा शोध सुरू आहे. रुचिका ही धनवटे नॅशनल कॉलेजमध्ये शिकत होती. ती पोलिस भरतीची तयारी करीत असल्याने पोलिस लाईन टाकळी येथे सरावासाठी जात होती. सरावादरम्यान ती इतर तरुण मुलांसोबत व्यायाम करीत असे. यावरून सौरभच्या मनात संशय निर्माण झाला होता. त्याने हटकल्यानंतरही ती ऐकत नव्हती. अखेर सौरभ रुचिकाला फिरायला घेऊन जाण्याच्या बहाण्याने येतरी येथील एका ओयो हॉटेलमध्ये घेऊन गेला. येथे दोघांमध्ये जोरदार वाद झाला. या वादातून सौरभने तीक्ष्ण शस्त्राने रुचिकाच्या गळ्यावर वार करून तिची हत्या केली व तेथून फरार झाला. कळमेश्वर पोलिसांनी खुनाचा गुन्हा नोंदवून आरोपी सौरभचा शोध सुरू केला आहे.
Jalna Crime: दुचाकीवरुन आले, रस्त्यात गाठलं अन् धाड धाड धाड.., तरुणाला संपवलं; जालन्यात दहशत

हिंदुत्ववादी कार्यकर्त्याच्या हत्येनंतर तणाव

दुसऱ्या घटनेत गिट्टीखदान परिसरात गुरुवारी रात्री अकराच्या सुमारास एका हिंदुत्ववादी कार्यकर्त्याची निर्घृण हत्या करण्यात आली. आर्थिक वादातून ही हत्या झाली असून याला जुन्या वैमनस्याचीही पार्श्वभूमी असल्याचा पोलिसांचा प्राथमिक अंदाज आहे. पांडे हिंदुत्ववादी संघटनेचा कार्यकर्ता असल्याने या संघटनांनी आरोपींना तातडीने मागणी केली. यामुळे या परिसरात तणाव निर्माण झाला. हर्ष ऊर्फ गुड्डू पांडे (वय ३८, रा. कामगारनगर) असे या मृत व्यक्तीचे नाव आहे. त्याचा भाऊ संदीपने आरोपी राहुल वैरागडे याच्याकडून १० हजार रुपये घेतले होते. परतफेड न झाल्याने दोघांत मध्ये वाद निर्माण झाला होता. आरोपी बंटी ऊर्फ बुर्हान शेख ऊर्फ बंटी पंथेलावाला (रा. आवस्थीनगर चौक) याचाही समावेश झाला होता. बंटी व राहुल संदीपला शोधत फिरत होते. संदीपला शोधत असताना त्यांना हर्ष दिसला. आरोपींनी कारमधून उतरून हर्षवर तिक्ष्ण शस्त्रांनी हल्ला चढविला. यात त्याचा मृत्यू झाला. या प्रकरणी गिट्टीखदान पोलिसांनी खुनाचा गुन्हा दाखल केला असून पोलिस या परिसरातील सीसीटीव्ही फुटेज तपासत आहेत.
Fake Railway Officer: ‘माझं मंत्रालयात कनेक्शन आहे’, निवृत्त पित्याच्या ओळखी वापरून रेल्वे अधिकाऱ्यांना फसवलं; बनावट निरीक्षकाचा कसा उधळला डाव?

विधी संघर्षग्रस्त मुलाकडून खून

पैशाच्या वादातून एका विधी संघर्षग्रस्त मुलाने तरुणाचा चाकूने वार करून खून केल्याची धक्कादायक घटना गुरुवारी रात्री अजनी पोलिस ठाणे हद्दीत घडली. योगेश अनिल काकडे (वय २८, रा. श्रीकृष्णनगर) असे मृत तरुणाचे नाव आहे. प्राप्त माहितीनुसार, योगेशला दारूचे व्यसन होते. आठ दिवसांपूर्वी त्याने पीयूपीचे काम करणाऱ्या १७ वर्षीय विधी संघर्षग्रस्त मुलाकडून दारूसाठी १,१०० रुपये घेतले होते. मुलाकडे पैसे नसल्याने त्याने दुसऱ्याकडून पैसे उधार घेऊन योगेशला दिले होते. मात्र त्यानंतरही पैसे परत न मिळाल्याने तो योगेशकडे वारंवार तगादा लावत होता. यावरून या अल्पवयीन आरोपीने मृतकाला बेसा–मानेवाडा मार्गावरील दीपक पान पॅलेससमोर अस्सल मराठा सावजी हॉटेलसमोर गाठले. आरोपीने योगेशवर चाकूने वार केले. यात योगेशचा मृत्यू झाला.