तरुण इमारतीवरून खाली पडला, जोरदार आवाजाने नागरिकांची धावाधाव

बालिकाश्रम रोडवर, न्यू आर्ट्स कॉलेजच्या पाठीमागे असलेल्या एका खासगी हॉस्टेलमध्ये प्रतीक वास्तव्यास होता. बुधवारी सकाळी साडेसात वाजताच्या सुमारास तो अचानक हॉस्टेलच्या इमारतीवरून खाली पडला. जोरदार आवाज होताच परिसरातील नागरिक धावून आले. गंभीर जखमी अवस्थेत रक्ताच्या थारोळ्यात पडलेल्या प्रतीकला पाहून सर्वांनाच धक्का बसला. प्रतीक इमारतीवरून खाली पडला, तो कोणत्या अवस्थेत होता, त्याचा तोल गेला की आणखी काही घटना घडली याबाबत मात्र अद्याप कोणतीही माहिती समजू शकलेली नाही.

तरुणाला जखमी अवस्थेत रुग्णालयात दाखल केलं पण…

रुग्णवाहिका चालक अतुल यादव शिंदे यांनी तातडीने त्याला जिल्हा शासकीय रुग्णालयात दाखल केलं. मात्र, रुग्णालयात पोहोचण्यापूर्वीच प्रतीकचा मृत्यू झाल्याचं डॉक्टरांनी घोषित केलं. या घटनेची माहिती मिळताच सिव्हिल हॉस्पिटलमधील डॉक्टर गणेश पोले यांनी तोफखाना पोलीस ठाण्याला कळवलं. तोफखाना पोलिसांनी घटनास्थळी धाव घेऊन पंचनामा केला असून या मृत्यू प्रकरणी आकस्मिक मृत्यूची नोंद करण्यात आली आहे.

प्रतीक मूळचा कुठल्या गावचा होता, तो नेमका कसा आणि कोणत्या परिस्थितीत इमारतीवरून पडला, हा घातपात होता की अपघात, याचा सखोल तपास पोलिसांकडून सुरू आहे. मृतदेह उत्तरीय तपासणीसाठी पाठवण्यात आला आहे. करिअरची स्वप्नं डोळ्यांत घेऊन शहरात आलेल्या प्रतीकचा असा अंत झाल्याने त्याच्या मित्रपरिवारासह हॉस्टेलमधील तरुणांमध्ये शोककळा पसरली असून, पालकवर्गातूनही हळहळ व्यक्त केली जात आहे. तरुण लेकाच्या जाण्याने त्याच्या कुटुंबीयांवरही दु:खाचा डोंगर कोसळला आहे. शहरात तरुणांच्या सुरक्षिततेचा प्रश्न पुन्हा एकदा ऐरणीवर आला आहे.