शेअर मार्केटचा नाद आणि १५ लाखांचा खड्डा

असर्जन भागातील जयप्रकाशनगर सोसायटीत राहणाऱ्या पांडुरंग आखरे यांना शेअर मार्केटचे वेड जडले होते. गेल्या दोन वर्षांत त्यांनी तब्बल १५ लाख रुपये गुंतवले, पण नफ्याऐवजी त्यांना तोटाच सहन करावा लागला. तरीही हार न मानता, पुन्हा गुंतवणूक करण्यासाठी त्यांनी पत्नीच्या सोन्याच्या गंठणावर डोळा ठेवला.

बँकेतून सोडवले अन् परस्पर विकले!

पत्नीने बँकेत गहाण ठेवलेले ४३ ग्रॅमचे सोन्याचे गंठण पांडुरंग यांनी जुलै २०२५ मध्ये पैसे भरून सोडवले. मात्र, ते घरी नेण्याऐवजी पत्नीला काहीही न सांगता परस्पर एका सराफाला विकले. यातून आलेले लाखो रुपये पुन्हा शेअर मार्केटमध्ये लावले, पण नियतीला काही वेगळेच मान्य होते; तिथेही त्यांचे सर्व पैसे बुडाले.

चाकूचा धाक अन् चोरीचा बनाव

पत्नी जेव्हा जेव्हा दागिन्यांबाबत विचारणा करू लागली, तेव्हा पांडुरंग यांची घाबरगुंडी उडाली. आपले कृत्य लपवण्यासाठी त्यांनी एखाद्या चित्रपटात शोभेल असा बनाव रचला. दोन दिवसांपूर्वी त्यांनी पोलीस ठाण्यात धाव घेत तक्रार दिली की, “अज्ञात चोरट्यांनी चाकूचा धाक दाखवून माझे सोन्याचे गंठण आणि दुचाकीची चावी पळवून नेली.”

पोलिसांचा संशय अन् बिंग फुटलं!

नांदेड ग्रामीण पोलिसांनी गुन्ह्याचे गांभीर्य ओळखून तपास सुरू केला. मात्र, पांडुरंग यांच्या सांगण्यातील विसंगती आणि घटनास्थळाची परिस्थिती पाहून पोलिसांना संशय आला. पोलिसांनी पांडुरंग यांना विश्वासात घेऊन पोलिसी खाक्या दाखवताच, त्यांनी सर्व सत्य ओकून टाकले. शेअर मार्केटमधील तोटा भरून काढण्यासाठी आपणच हे कृत्य केल्याची कबुली त्यांनी दिली.

आता पोलिसा पाहुणचार!

खोटी तक्रार देऊन पोलिसांची दिशाभूल केल्याप्रकरणी आणि प्रशासनाचा वेळ वाया घालवल्यामुळे ग्रामीण पोलिसांनी पांडुरंग आखरे यांच्यावर कलम २१७ आणि ११८ (१) अन्वये गुन्हा दाखल केला आहे. या घटनेने परिसरात मोठी खळबळ उडाली असून “दुप्पट पैसे करण्याच्या नादात घराची राखरांगोळी झाली,” अशी चर्चा नागरिक करत आहेत.