बुलढाणा: मुख्यमंत्री माझी लाडकी बहीण योजना महिलांच्या आर्थिक सक्षमीकरणासाठी राज्य सरकारची महत्वाकांक्षी योजना मानली जाते. मात्र, बुलढाणा जिल्ह्यात या योजनेचा लाभ घेणाऱ्या सुमारे ३० हजार महिलांचा गेल्या दोन महिन्यांपासूनचा 1500 रुपयांचा मासिक हप्ता अचानक थांबल्याने मोठी खळबळ उडाली आहे.
योजना कायमस्वरूपी बंद होणार असल्याच्या अफवा पसरल्याने ग्रामीण भागातील महिलांमध्ये भीतीचे वातावरण निर्माण झाले असून, संतप्त महिलांनी जिल्हा महिला व बालकल्याण कार्यालयात गर्दी करत चौकशी सुरू केली आहे.
बुलढाणा जिल्ह्यात सध्या साडेसहा लाखांहून अधिक महिला लाडकी बहीण योजनेचा लाभ घेत आहेत. मात्र, प्रशासकीय पडताळणीदरम्यान ई-केवायसी प्रक्रियेत त्रुटी आढळल्याने सुमारे ३० हजार लाभार्थी महिलांचे हप्ते तात्पुरते रोखण्यात आले आहेत. बँक खाते आधारशी लिंक नसणे, आधार तपशीलात तफावत किंवा तांत्रिक अडचणी ही यामागची प्रमुख कारणे असल्याचे स्पष्ट झाले आहे.
Buldhana Accident : तो ओरडतच राहिला अन् क्षणात सर्व काही संपलं! ; 22 वर्षांच्या सौरभचा ट्रॅक्टरखाली दबून दुर्दैवी अंत, बुलढाण्यात हळहळ
योजना बंद झाल्याच्या वावड्या उठल्याने महिलांमध्ये प्रचंड संभ्रम निर्माण झाला. अनेक महिलांनी “आमचा हक्काचा पैसा नेमका का थांबला?” असा सवाल उपस्थित करत प्रशासनाकडे थेट धाव घेतली.
या पार्श्वभूमीवर महिला व बालकल्याण विभागाने खुलासा करत योजना बंद झालेली नसल्याचे स्पष्ट केले आहे. केवळ ज्यांच्या कागदपत्रांमध्ये किंवा ई-केवायसी प्रक्रियेत त्रुटी आहेत, त्यांचाच लाभ तात्पुरता थांबवण्यात आला असून, आवश्यक दुरुस्ती पूर्ण होताच रखडलेले हप्ते मिळणार असल्याचे प्रशासनाने सांगितले आहे.
दरम्यान, अन्य काही ठिकाणीही पैसे न आल्याने महिलांनी आंदोलनाचा पवित्रा घेतल्याचे चित्र आहे. महिलांच्या आर्थिक आधाराशी संबंधित योजना असल्याने तांत्रिक अडचणींमुळे लाभार्थ्यांना त्रास होऊ नये, यासाठी प्रशासनाने तातडीने मार्गदर्शन शिबिरे, ई-केवायसी सुधारणा मोहिमा राबवाव्यात, अशी जोरदार मागणी होत आहे.
दरम्यान, लाडकी बहिण योजना ( Ladki Bahin Yojana ) महाराष्ट्र सरकारची एक महत्वाकांक्षी योजना आहे, जी महिलांना आर्थिक सशक्तिकरणासाठी सुरू करण्यात आली आहे. या योजनेअंतर्गत, 21 ते 65 वर्षे वयोगटातील महिलांना दरमहा 1500 रुपये देण्यात येतात.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा