पुणे महानगर पालिका निवडणुकीत अजित पवारांच्या राष्ट्रवादीला मोठा फटका बसला आहे. अजित पवारांनी 20 दिवस शहरात ठाण मांडल्यानंतर देखील पक्षाला 30 चा आकडा देखील पार करता आला नाही. तर दुसरीकडे भाजपने पालिकेत एकहाती वर्चस्व प्रस्थापित केले आहे. भाजपच्या विजयात सर्वात मोठा हात हा युवक पदाधिकाऱ्यांचा होता. त्यामुळे आता अजित पवारांनी देखील आगामी जिल्हा परिषद निवडणुकीसाठी आपली रणनीती बदलली आहे. राष्ट्रवादी काँग्रेसने आता ग्रामीण भागावर लक्ष केंद्रित केले असून पक्षांतर्गत बदलांना वेग दिला आहे.याच रणनीतीचा भाग म्हणून पुणे जिल्हा युवक राष्ट्रवादी काँग्रेसच्या अध्यक्षपदी युवक कार्यकर्ते निलेश थीगळे यांची नियुक्ती करण्यात आली आहे. आगामी जिल्हा परिषद निवडणुकांच्या तोंडावर संघटनेला नवी उभारी देण्यासाठी अजित पवार यांनी हा मोठा निर्णय घेतला आहे.