मिळालेल्या माहितीनुसार, सुपारीच्या कथित बेकायदेशीर व्यापारात वारंवार चर्चेत आलेले राजू अण्णा उर्फ राजेश शिनॉय, अलताफ कलीवाला, आसिफ कलीवाला, गनी कलीवाला यांच्यासह काही ट्रान्सपोर्टर्स आयकर विभागाच्या रडारवर आले आहेत. मुंबईतील सुपारी व्यापारी फारूक भाई यांच्याशी असलेल्या कथित आर्थिक व्यवहार आणि कनेक्शनमुळे नागपुरातील या व्यापाऱ्यांवर ही धडक कारवाई झाल्याची चर्चा आहे.

शनिवारी पहाटेपासून आयकर विभागाची मोठी टीम शहरात सक्रिय झाली. शांतिनगर आणि कामठी रोड येथील राजू अण्णा यांच्या निवासस्थानावर झडती सुरू असून, कलीवाला बंधूंच्या कार्यालये व गोदामांचीही सखोल तपासणी करण्यात येत आहे. याशिवाय गनी कलीवाला यांच्या कार्यालय-गोदामावरही छापा टाकण्यात आला आहे. कळमना परिसर आणि मां उमिया इंडस्ट्रियल एरिया येथे असलेल्या सुपारी व्यापाऱ्यांच्या गोदामांमध्येही तपास सुरू आहे.
Kolhapur Accident: कोल्हापुरात प्रसुतीनंतर डिस्चार्ज घेऊन घरी जाताना अपघात, बाळंतीणचा मृत्यू, सात दिवसांचं बाळ जखमी, PI ची तडकाफडकी बदली
जागनाथ बुधवारी आणि इतवारी परिसरातील सुपारी व्यापाराशी संबंधित दुकानांवर आयकर विभागाचे पथक पोहोचल्याने व्यापाऱ्यांमध्ये भीतीचे वातावरण निर्माण झाले. या कारवाईदरम्यान कडेकोट बंदोबस्त ठेवण्यात आला होता. एके-47 शस्त्रांनी सज्ज सुरक्षा जवान, तसेच डॉग स्क्वॉडच्या उपस्थितीमुळे परिसरात तणावपूर्ण शांतता दिसून आली.

नागपूर हे मध्य भारतातील सुपारी व्यापाराचे मोठे केंद्र मानले जाते. येथून संपूर्ण मध्य भारतात सुपारीचा पुरवठा होतो. विशेषतः सडलेल्या सुपारीचा मोठ्या प्रमाणावर वापर तंबाखू, मावा आणि गुटखा निर्मितीसाठी होत असल्याचे सांगितले जाते. आयकर विभागाला संशय आहे की या व्यापारातून मोठ्या प्रमाणावर करचुकवेगिरी करण्यात आली असून, काळ्या पैशाचा व्यवहार देशभर पसरलेला असू शकतो.

दरम्यान, छाप्यांमध्ये नेमके काय हाती लागले याबाबत आयकर विभागाचे अधिकारी सध्या कोणतीही अधिकृत माहिती देण्यास तयार नाहीत. तपास पूर्ण झाल्यानंतरच अधिक तपशील समोर येणार असल्याचे संकेत दिले जात आहेत. या कारवाईमुळे नागपुरातील व्यापारी वर्तुळात मोठी चर्चा सुरू असून, पुढील काही दिवसांत या प्रकरणाला आणखी वेगळे वळण मिळण्याची शक्यता वर्तवली जात आहे.