कोल्हापुरात 2015 नंतर महापालिका निवडणूक होत आहे. 11 वर्षानंतर झालेल्या कोल्हापुरातील निवडणुकीचा निकाल पाहिल्यास एकूण 81 पैकी भाजप 26, शिवसेना शिंदे गट 15, राष्ट्रवादी काँग्रेस 4, काँग्रेस 34, ठाकरे गट 1 आणि इतर – 1 असे पक्षीय बलाबल आहे. त्यामुळे भाजप, शिवसेना आणि राष्ट्रवादी काँग्रेस एकत्र आल्यास बहुमताचा 41 ही संख्या गाठू शकतात. या आकडेवारीवरून मात्र काँग्रेसने सतेज पाटील यांच्या नेतृत्त्वाखाली दिलेली टक्कर दिसून येते.
एकट्याची लढत महायुतीला जड
कोल्हापूर कसं तुम्ही म्हणशीला तस्सं अशी मोहिम सतेज पाटील यांच्या नेतृत्त्वाखाली काँग्रेसने राबवली होती. शिवसेना उद्धव ठाकरे गटाला सतेज पाटील यांनी सोबत घेतले होते. ठाकरे गटाची ताकद मर्यादित असल्याने काँग्रेसकडेच नेतृत्व होते. सतेज पाटील विरुद्ध महायुतीचे सर्व घटक पक्ष असे चित्र कोल्हापुरात उभे राहिले होते. महायुतीला विधानसभेत कोल्हापुरात घवघवीत यश मिळाले असल्याने महापालिका निवडणूकही सहज जिंकता येईल असे दिसत होते. मात्र सतेज पाटलांनी एक खांबी तंब्बूने महायुतीला ही निवडणूक कठीण केली.
ज्यावेळी कल येत होते त्यावेळीही काँग्रेसने बऱ्यापैकी आघाडी घेतली होती. पण महायुतीच्या जागा काही वेळाने वाढल्या आणि सत्तास्थापन करता येईल इतपत झाल्या. तरी महापालिकेच्या निवडणुकीत काँग्रेस सर्वाधिक उमेदवार जिंकलेला पक्ष ठरला आहे.