मतदान संपल्यानंतर तातडीने सर्व मशिन ‘सील’बंद करून मतमोजणीच्या ठिकाणी असलेल्या ‘स्ट्राँगरूम’मध्ये हलविण्यात आला. या ठिकाणी चोख बंदोबस्त ठेवला असून, सीसीटीव्हीही बसविले आहेत. ‘ईव्हीएम’मध्ये बंद झालेले उमेदवारांचे भवितव्य आज, शुक्रवारी सकाळी खुले होईल.
Pune Election 2026: आज ठरणार पुण्याचा कारभारी! दुपारपर्यंत चित्र होणार स्पष्ट, किती टक्के मतदान झालं?
महापालिका निवडणुकीसाठी ४१ प्रभागांतून १६५ सदस्य निवडून येणार आहेत. यातील ४० प्रभाग चार सदस्यीय आणि एक प्रभाग पाच सदस्यीय आहेत. या निवडणुकीसाठी क्षेत्रीय कार्यालयनिहाय १५ निवडणूक निर्णय अधिकारी नियुक्त करण्यात आले आहेत. त्यानुसार महापालिकेने मतमोजणीचे तपशील जाहीर केले आहेत. सकाळी १० वाजता मतमोजणी प्रक्रिया सुरू होईल. मतदान यंत्र ‘सील’बंद असल्याची खात्री पक्षाच्या प्रतिनिधींसमोर करवून घेतल्यानंतर पुढील प्रक्रिया सुरू होईल. सर्वप्रथम पोस्टल मतांची मोजणी होईल. त्यानंतर ‘ईव्हीएम’वरील मतांची मोजणी सुरू होईल.

आंबेगाव-कात्रजला विलंब?
प्रभागनिहाय मतमोजणी फेऱ्यांचा विचार करता सर्वांत कमी चार फेऱ्या १३ प्रभागांमध्ये होणार असून, येथील निकाल लवकर जाहीर होईल. पाच सदस्यीय प्रभाग असलेल्या प्रभाग क्रमांक ३८ बालाजीनगर- आंबेगाव- कात्रज येथे १० फेऱ्या होणार आहेत. त्यामुळे या प्रभागाच्या निकालाला विलंब होऊ शकतो.

कसबा, कोंढव्यात १२ फेऱ्या
क्षेत्रीय कार्यालयनिहाय दोनच प्रभागांचा समावेश असलेल्या कोंढवा येवलेवाडी क्षेत्रीय कार्यालयाअंतर्गत प्रभाग क्रमांक ३९ अप्पर सुप्पर इंदिरानगर व प्रभाग क्रमांक ४० कोंढवा बुद्रुक येवलेवाडीमध्ये प्रभागनिहाय सर्वाधिक प्रत्येकी १२ फेऱ्या होणार आहेत. बिबवेवाडी क्षेत्रीय कार्यालय (प्रभाग क्रमांक २०, २१, २६) व कसबा विश्रामबागवाडा (प्रभाग २५, २७, २८) क्षेत्रीय कार्यालयाअंतर्गत; तसेच कोंढवा येवलेवाडी क्षेत्रीय कार्यालयाअंतर्गत सर्वांत कमी १२ फेऱ्या होणार आहेत. त्यामुळे येथील मतमोजणी लवकर पूर्ण होऊन या प्रभागांचा निकाल लवकर जाहीर होण्याची शक्यता आहे. प्रभाग क्रमांक ३५मधील दोन जागांवर उमेदवार बिनविरोध निवडून आल्याने प्रभाग ३५चा निकाल सर्वांत लवकर जाहीर होण्याची शक्यता आहे.
Pune Election Exit Poll 2026: पुण्याचा नवा ‘कारभारी’ कोण होणार? पुणे महापालिका एक्झिट पोलची मोठी आकडेवारी समोर
अशी होईल मतमोजणी
-पोस्टल मतांची मोजणी झाल्यानंतर ‘ईव्हीएम’ मधील मतदानाची मोजणी होईल.
-यासाठी प्रत्येक निवडणूक निर्णय अधिकारी कार्यालयाशी (क्षेत्रीय कार्यालयाशी) संलग्न प्रभागांपैकी पहिल्या प्रभागातील सर्व फेऱ्या पार पाडल्या जातील.
-त्यानंतर पुढील प्रभागातील मतदानाची मोजणी होईल.

मतमोजणीत पहिल्या फेरीला साधारण अर्धा तास लागण्याची शक्यता आहे. त्यानंतरच्या फेऱ्या १५-२० मिनिटांत पूर्ण होतील. पहिला निकाल साडेअकरापर्यंत जाहीर होऊ शकतो, तर साडेतीन चारपर्यंत मतमोजणीची प्रक्रिया पूर्ण होईल. –प्रसाद काटकर, महापालिकेचे निवडणूक उपायुक्त