मुंबई: महापालिका निवडणुकीचा जाहीर प्रचार 48 तास आधी थंडावला असला, तरी वेगवेगळ्या व्हॉट्सअॅप ग्रुपवर मात्र राजकीय वातावरण तापले आहे. कार्यकर्ते, समर्थक हे आपण राहत असलेल्या गृहनिर्माण सोसायट्या, उत्सव मंडळे, तरुण वर्ग, महिला, ज्येष्ठ नागरिक यांच्या व्हॉट्सअॅप ग्रुपमध्ये सक्रिय झाले आहेत. आपल्याच उमेदवाराला मत द्या, असे आवाहन विविध पोस्टच्या माध्यमातून करताना दिसत आहेत. यावर चर्चाही रंगल्या आहेत.
एकमेकांच्या संपर्कात राहण्यासाठी, दैनंदिन कामांच्या संदेशांची देवाणघेवाण करण्यासाठी मुंबईत गृहनिर्माण सोसायट्यांचे पदाधिकारी व्हॉट्सअॅप ग्रुप तयार करतात. वेगवेगळ्या उत्सव मंडळांचे कार्यकर्ते, तरुण-तरुणी, महिला मंडळे, मॉर्निंग वॉक ग्रुप, योगा-व्यायामशाळांचे ग्रुप, उद्यानांमध्ये फेरफटका मारणाऱ्या ज्येष्ठ नागरिकांचे, तसेच कॉलेजच्या तरुणांचे ग्रुप असे अनेक प्रकारचे व्हॉट्सअॅप ग्रुप आहेत. कार्यकर्ते अशा ग्रुपमध्ये मंगळवारी रात्रीपासूनच वेगवेगळ्या प्रकारचे संदेश पाठवून आपल्याच उमेदवाराला निवडून द्या, असे आवाहन करत आहेत. विशेष म्हणजे, एकाच ग्रुपमध्ये वेगवेगळ्या राजकीय पक्षांचे समर्थक आणि कार्यकर्ते आहेत. ते आपापल्या पक्षांची भूमिका मांडत आहेत. यातून वाद उद्भवू नयेत, यासाठी काही ठिकाणी व्हॉट्सअॅप ग्रुपचे सेटिंग बदलून ‘ओन्ली फॉर अॅडमिन’ करण्यात आल्याची माहिती आहे. अनेक ग्रुपवर ‘अॅडमिन’सह सोसायटी किंवा मंडळाचे पदाधिकारी यांनीही पुढाकार घेत राजकारणामुळे आपल्यात वाद होणार नाहीत, याची काळजी घेण्याचे आवाहन केले. उमेदवारांना किंवा राजकीय पक्षांना सोशल मीडियावर सध्या काहीच अपलोड करता येत नसले, तरी या ग्रुपच्या माध्यमातून त्यांचे कार्यकर्ते, पदाधिकारी, समर्थक प्रचार करत आहेत.
मराठी-अमराठी मतदारांमध्ये ‘तू-तू, मैं-मैं’
गृहनिर्माण सोसायट्यांमध्ये मराठीसह इतर भाषिकही असल्याने संदेशांच्या माध्यमातून ‘तू-तू, मैं-मैं’ सुरू असल्याचे चित्र आहे. मराठी रहिवाशांना मुंबई वाचविण्यासाठी मराठी उमेदवारालाच आणि ठरावीक पक्षालाच मतदान करा, असे आवाहन केले जात आहेत. ‘तिळगुळ घ्या, महाराष्ट्रात मराठीच बोला,’ असे संदेश पाठवत मतदानाला प्रोत्साहन दिले जात आहे. दुसरीकडे, इतर भाषांमध्येही वेगवेगळ्या प्रकारचे संदेश ग्रुपवर टाकण्यात येत आहेत. ‘मराठी उमेदवार, मराठी पक्षाची सत्ता आली, तर जगणे कठीण होईल,’ अशा आशयाची पोस्टही व्हायरल होत आहे.