दरम्यान, विश्वजीत बारणे यांनी मतदारांना पैसे वाटल्याचा गंभीर आरोप भाजप पुरस्कृत उमेदवार गणेश गुजर आणि करिष्मा बारणे यांनी केला आहे. या आरोपांमुळे पिंपरी- चिंचवडच्या राजकारणात मोठी खळबळ उडाली असून, राज्यात युती असलेल्या शिवसेना आणि भाजप या दोन्ही पक्षांमध्ये आरोप-प्रत्यारोपांच्या जोरदार फैरी झडत आहेत.

भाजप पुरस्कृत उमेदवारांनी आरोप केला आहे की, विश्वजीत बारणे यांच्या समर्थकांकडून दडपशाही केली जात असून थेरगाव परिसरात मोठ्या प्रमाणावर पैशांचे वाटप सुरू आहे. वडील खासदार असल्यामुळे शासकीय आणि प्रशासकीय यंत्रणा त्यांना सहकार्य करत असल्याचा आरोपही त्यांनी केला आहे. या प्रकरणी निवडणूक आयोगाकडे तक्रार दाखल करण्यात आल्याची माहिती उमेदवारांनी दिली.

BMC Election 2026: ठाकरे बंधू की महायुती? मुंबईच्या महासंग्रामाचा ‘काऊंटडाऊन’ सुरू; मतदानासाठी महापालिकेची यंत्रणा सज्ज

प्रभाग क्रमांक २४ मध्ये साम, दाम, दंड, भेद या सर्व मार्गांचा अवलंब करून निवडणूक लढवली जात असल्याचा आरोप करत, लोकशाहीचा गळा घोटण्याचे काम प्रशासकीय अधिकारी करत असल्याचा दावाही भाजप पुरस्कृत उमेदवारांनी केला आहे. ही निवडणूक ‘धनशक्ती विरुद्ध जनशक्ती’ अशी असल्याचे त्यांनी स्पष्ट केले.

भाजप पुरस्कृत उमेदवार म्हणाले, “आमच्या प्रभागात अपेक्षित विकास झालेला नाही. संबंधित उमेदवारांना नागरिक ओळखत नाहीत. त्यामुळे त्यांना मतदारांना पैसे वाटावे लागत आहेत. मते विकत घेण्याचा प्रयत्न सुरू आहे.”

तसेच, “प्रभाग क्रमांक २४ मध्ये विरोधी पॅनल असून शासकीय आणि पोलीस यंत्रणांवर दबाव टाकला जात आहे. आमच्या समर्थकांवर दडपशाही होत असून खोट्या गुन्ह्यांत अडकवण्याच्या धमक्या दिल्या जात आहेत. निष्पक्ष निवडणूक व्हावी, यासाठी आम्ही निवडणूक आयोगाकडे पत्र दिले आहे,” असेही त्यांनी सांगितले.

थेरगाव परिसरात १० ते १५ हजार मतदारांना पैसे वाटप करण्यात आल्याचा आरोप करत, दहा रुपयांच्या नोटेवर ‘हवाला’ देण्यात आल्याचेही भाजप पुरस्कृत उमेदवारांनी म्हटले आहे. “पॅनल निवडून आल्यावर ही दहा रुपयांची नोट आमच्याकडे आणा, त्यानंतर पैसे दिले जातील,” असा प्रकार सुरू असल्याचा दावाही त्यांनी केला.

खासदार बारणेंची प्रतिक्रिया

दरम्यानस या प्रकरणावर आता खासदार श्रीरंग बारणे यांची प्रतिक्रिया समोर आली आहे. ते म्हणाले की, “समोरचे उमेदवार पूर्णपणे हतबल झाले आहेत. त्यांना त्यांचा पराभव स्पष्टपणे दिसत असल्यामुळेच ते बिनबुडाचे आरोप करत आहेत. मी आतापर्यंत नऊ निवडणुका लढवल्या असून ही त्यांच्या विरोधातील चौथी निवडणूक आहे. २००२ साली त्यांच्या आईचा पराभव मी केला होता. त्यामुळे त्यांनी आमची चिंता करू नये, थेट जनतेमध्ये जावं. सध्या पराभवाची छाया दिसत असल्याने असे आरोप केले जात आहेत. त्यांच्याकडे सांगण्यासारखं काही नाही. १५ ते २० वर्षे ते नगरसेवक होते, त्यांनी त्या काळात काय केलं ते जनतेसमोर मांडावं. खरंच काम केलं असतं, तर अशा प्रकारचे आरोप करण्याची वेळ त्यांच्यावर आली नसती.”

लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा