म. टा. वृत्तसेवा, अकोला: अकोट नगरपरिषदेत सत्ता स्थापनेसाठी भाजपने एमआयएमसोबत आघाडी केल्याने राज्यभर चर्चा झाली होती. ही आघाडी गुंडाळून ठेवल्यानंतर भाजपसमोर सत्ता स्थापनेचा पेच निर्माण झाला होता. त्यातून मार्ग काढत अकोटमध्ये सत्तेचा एक नवीन पॅटर्न उदयास आला आहे. यावेळी एमआयएम, काँग्रेस व वंचित बहुजन आघाडी यांना दूर ठेवण्यात आले आहे. भाजपने शिवसेना, शिवसेना(उबाठा), राष्ट्रवादी काँग्रेस पार्टी, राष्ट्रवादी काँग्रेस (शरद पवार ) पार्टी व प्रहार जनशक्ती पक्षासोबत आघाडी केली.
अकोट नगरपालिकेच्या नगराध्यक्षपदी भाजपच्या माया धुळे विजयी झाल्या. मात्र नगर परिषदेमध्ये सत्ता स्थापनेकरिता सदस्य संख्या कमी असल्याने भाजपने एमआयएम सोबत आघाडी केली. आणि संपूर्ण महाराष्ट्रभर या आघाडीच्या चर्चेने खळबळ उडाली. मुख्यमंत्री देवेंद्र फडणवीस यांनी या प्रकरणात चौकशीचे आदेश दिले. भाजपचे प्रदेशाध्यक्ष रवींद्र चव्हाण यांनी भाजपचे आमदार प्रकाश भारसाकळे यांना कारणे दाखवा नोटीस बजावली. त्यामुळे स्थानिक भाजपने केलेल्या या आघाडीला गुंडाळून ठेवावे लागले.
आता सत्ता ताब्यात घेण्याकरिता अकोट शहर विकास मंच हा गट स्थापन करण्यात आला आहे. तसा प्रस्ताव सुद्धा जिल्हाधिकाऱ्यांकडे सादर करण्यात आला. या नवीन गटात भाजप, शिवसेना, शिवसेना (उबाठा), राष्ट्रवादी काँग्रेस पार्टी, राष्ट्रवादी काँग्रेस (शरद पवार ) पार्टी व प्रहार जनशक्ती पक्षांच्या नगरसेवकांचा समावेश आहे. यात नगराध्यक्षांसह एकूण २१ नगरसेवक आहेत. या गटात एमआयएमचा समावेश नसून त्यांच्या स्वतंत्र गटाला मान्यता देण्यात आली. काँग्रेस व वंचित बहुजन आघाडी या मंचापासून दूर आहे. नगर परिषदेत काँग्रेसचे ६, एमआयएमचे ५ तर ‘वंचित’चा एक नगरसेवक आहे.
डिसेंबर महिन्यात झालेल्या अकोट नगर परिषदेमध्ये नगराध्यक्षपद भाजपला मिळाले .नगरसेवकांच्या ३३ जागांपैकी भाजपाला सर्वाधिक ११ जागा मिळवता आल्या. उपनगराध्यक्ष, विषय समित्यांसह अन्य सत्तेसाठी बहुमताचा आकडा मात्र भाजपकडे नव्हता. त्यामुळे काही दिवसांपूर्वी भाजपसह, एमआयएम, दोन्ही शिवसेना, दोन्ही राष्ट्रवादी, प्रहार जनशक्ती, या पक्षांची मोट बांधत अकोट शहर विकास मंच गठीत करण्यात आला. मात्र या आघाडीचे पडसाद उमटताच पुन्हा यातील काही पक्षांना बाहेर करण्यात आले. आता अकोट विकास मंचामध्ये भाजपचे ११, राष्ट्रवादी काँग्रेस २, राष्ट्रवादी काँग्रेस (शरद पवार) १, शिवसेना १, शिवसेना (उबाठा) २ व प्रहारच्या ३ सदस्यांचा समावेश आहे.
राज्यातील महायुतीमध्ये शरद पवार यांची राष्ट्रवादी काँग्रेस व उद्धव ठाकरे यांची शिवसेना या दोन्ही पक्षांचा समावेश नसताना स्थानिक व सोयीच्या राजकारणासाठी मात्र महायुतीच्या ध्येय धोरणाला तिलांजली देत, या दोन्ही पक्षांना जवळ घेत भाजपने सत्ता स्थापनेचा दावा केला आहे.