मिळालेल्या माहितीनुसार, कुणाल संतापे (रा. यशोधरा नगर) असे आरोपीचे नाव असून तो पीडित अल्पवयीन मुलीच्या शेजारी राहत होता. पूर्वी आरोपी आणि मुलगी यांच्यात ओळख होती. मात्र कुटुंबीयांच्या हस्तक्षेपानंतर मुलीने आरोपीपासून स्पष्टपणे अंतर ठेवले होते. याच गोष्टीचा राग आणि संशय आरोपीच्या मनात साचत गेला. मुलीचे इतर कोणासोबत संबंध असल्याचा संशय त्याने डोक्यात धरला आणि त्यातूनच ही भीषण घटना घडल्याचे प्राथमिक तपासात समोर आले आहे.

घटनेच्या दिवशी आरोपीने आधी मुलीच्या भावाशी वाद घातला. सुरुवातीला शाब्दिक वाद झाला, मात्र काही क्षणातच हा वाद हिंसक झाला. संतापाच्या भरात आरोपीने चाकू काढून मुलीच्या भावावर वार केले. अचानक झालेल्या हल्ल्यात तो गंभीर जखमी झाला. भावाला वाचवण्यासाठी मध्ये पडलेल्या अल्पवयीन मुलीवरही आरोपीने निर्दयपणे चाकूचे वार केले. काही क्षणांतच संपूर्ण परिसर रक्तरंजित झाला.

Ganesh Naik: ‘शिंदेंच्या सेनेसोबत युती नकोच होती’, भाजपच्या बड्या नेत्याचं मोठं वक्तव्य

घटनेनंतर स्थानिक नागरिकांनी तत्काळ धाव घेत जखमी भावंडांना मेयो रुग्णालयात दाखल केले. डॉक्टरांनी दिलेल्या माहितीनुसार, दोघांची प्रकृती गंभीर होती, मात्र वेळेवर उपचार मिळाल्याने सध्या त्यांची स्थिती स्थिर असल्याचे सांगण्यात आले आहे. या घटनेमुळे परिसरातील नागरिकांमध्ये संताप व्यक्त होत आहे.

दरम्यान, घटनेनंतर फरार झालेल्या आरोपीचा यशोधरा नगर पोलिसांनी वेगाने शोध घेतला. तांत्रिक विश्लेषण, सीसीटीव्ही फुटेज आणि गोपनीय माहितीद्वारे काही तासांतच आरोपीला अटक करण्यात आली. पोलिसांनी आरोपीकडून हल्ल्यासाठी वापरलेला चाकूही जप्त केला आहे.

या प्रकरणी पोलिसांनी आरोपीविरुद्ध भारतीय दंड विधानातील कलम ३०७ सह इतर गंभीर कलमांखाली गुन्हा दाखल केला आहे. सध्या आरोपीची कसून चौकशी सुरू असून, या घटनेमागील सर्व बाजू तपासल्या जात आहेत.