भाजप सत्ता मिळवण्यासाठी काहीही करु शकते, या विरोधकांच्या टिकेचा प्रत्यय अकोला जिल्ह्यात आला आहे. अकोट नगरपंचायतीमध्ये भाजपला बहुमत मिळाले नाही, त्यामुळे पक्षाने एमआयएमला सोबत घेऊन ‘अकोट विकास मंचा’ची स्थापना केली.

या आघाडीत उपमुख्यमंत्री एकनाथ शिंदे यांच्या नेतृत्वातील शिवसेना आणि उपमुख्यमंत्री अजित पवार यांची राष्ट्रवादी काँग्रेस हे राज्यातील सत्ताधारी महायुतीतील घटकपक्ष तर आहेतच. मात्र शिवसेना (उद्धव बाळासाहेब ठाकरे) आणि बच्चू कडू यांच्या प्रहार पक्षाचा देखील समावेश आहे. त्यामुळे या आघाडीच्या कडबोळ्यावर राजकीय वर्तुळात आश्चर्य व्यक्त केले जात आहे.
BMC Election च्या तोंडावर ठाकरे बंधूंनी प्रचाराचा पॅटर्न बदलला, ‘ती’ भीती कारण? जाहीर सभांऐवजी फक्त…
दरम्यान, अकोला जिल्हाधिकाऱ्यांकडे ‘अकोट विकास मंचा’ची नोंद करण्यात आली आहे. यातील सर्व पक्षांना भारतीय जनता पक्षाच्या व्हिपचे पालन करणे बंधनकारक राहणार असून भाजप आमदार रवी ठाकूर हे या आघाडीचे गटनेते आहेत.

कसे आहे पक्षीय बलाबल?

अकोट नगरपंचायतीमध्ये एकूण ३५ जागा आहेत. त्यापैकी दोन जागा रिक्त असून ३३ जागांवर निवडणूक झाली. भाजपला सर्वाधिक ११ जागा मिळाल्या, परंतु स्वबळावर सत्ता स्थापन करण्यास यश आले नाही. त्यानंतर ५ जागा मिळवणाऱ्या एमआयएमला सोबत घेऊन भाजपने सरकार स्थापन केले आहे.
Pune News : पुण्यातील चिमुरडीचा खोकला 8 महिने जाईना, निदान होईना; अचानक नर्स खोकली आणि आईची ‘ती’ सवय डॉक्टरांनी हेरली
या आघाडीत ठाकरेंच्या शिवसेनेचे दोन, शिंदेंच्या शिवसेनेचा एक, अजित पवारांच्या राष्ट्रवादीचे दोन, शरद पवारांच्या राष्ट्रवादीचे दोन, तर बच्चू कडू यांच्या प्रहारचे तीन सदस्य आहेत. म्हणजेच एकूण २६ जण आहेत. काँग्रेसचे ५ सदस्य आणि वंचित बहुजन आघाडीचे दोन सदस्य विरोधी पक्षात बसणार आहेत.

नगराध्यक्षपदाच्या निवडणुकीत भाजपच्या माया धुळे विजयी झाल्या आहेत. १३ जानेवारीला उपनगराध्यक्ष आणि स्वीकृत सदस्यांच्या निवडीत ही आघाडी एकत्रित मतदान करणार आहे.