नाशिक: नाशिक जिल्ह्यातील नांदगाव तालुक्यात शाळेत जाणाऱ्या एका अल्पवयीन मुलीचा पाठलाग करून तिच्यासोबत गैरकृत्य करण्याचा प्रयत्न केल्याची धक्कादायक घटना घडली आहे. साधूवेशातील दोन व्यक्तींनी हा प्रकार केला असून, याप्रकरणी नांदगाव पोलीस ठाण्यात त्यांच्याविरुद्ध गंभीर गुन्हा दाखल करण्यात आला आहे. या घटनेमुळे परिसरात मोठी खळबळ उडाली आहे.
मिळालेल्या माहितीनुसार, सोमवारी सकाळी साडेनऊच्या सुमारास पीडित अल्पवयीन मुलगी आपल्या मैत्रिणीसोबत पायी शाळेत जात होती. जाधव वस्ती परिसरात, हिसवळ बाजूकडून मोटारसायकलवर आलेल्या साधूसारखे भगवे वस्त्र परिधान केलेल्या दोन जणांनी या मुलींकडे पाहिले. काही अंतर पुढे गेल्यानंतर त्यांनी मोटारसायकल परत फिरवली आणि मुलींच्या दिशेने येत रस्त्यावर गाडी उभी केली आणि त्यातील एक जण खाली उतरला. हे पाहून दोन्ही मुली घाबरून हिसवळच्या दिशेने धावू लागल्या. त्यावेळी तो इसम त्यांच्या मागे धावला. धावता धावता एक मुलगी थकून थांबली असता, त्या इसमाने तिचा हात पकडून ओढण्याचा प्रयत्न केला. त्यावेळी तिच्या मैत्रिणीने धाडस दाखवत आरडाओरडा केला आणि तिचा हात धरून तिला पळवून नेले. त्यामुळे तो इसम घाबरून तेथून पसार झाला. त्याच वेळी गावातील मच्छिंद्र खाडे हे मोटारसायकलवरून येत असल्याने मुली त्यांच्या गाडीवर बसून हिसवळ येथील शाळेजवळ उतरल्या.
भीतीमुळे दोन्ही मुलींनी तात्काळ हा प्रकार कुणालाही सांगितला नाही. नंतर पीडित मुलींनी आपल्या वडिलांना फोन करून घडलेला प्रकार सांगितला. त्यानंतर शाळेत मुख्याध्यापकांना माहिती दिली असता ग्रामस्थांच्या मदतीने बेजगाव परिसरात या दोन्ही इसमांना पकडण्यात आले. पोलिसांनी घटनास्थळी दाखल होऊन चौकशी केली. यावेळी सुरेश तुकाराम जगताप (रा. गोसावीवाडी, दत्तनगर, पहुरकसबे, ता. जामनेर, जि. जळगाव) आणि नारायण दादाराव शिंदे (रा. बाबरनगर, अंबड, ता. अंबड, जि. जालना) हे दोन आरोपी निष्पन्न झाले.
दरम्यान, या प्रकरणी पीडित अल्पवयीन मुलीने नांदगाव पोलीस ठाण्यात फिर्याद दिल्यानंतर दोन्ही नराधम आरोपींवर गुन्हा दाखल करण्यात आला आहे. सदर घटनेचा पुढील तपास पोलीस उपनिरीक्षक संतोष बहाकर यांच्या नेतृत्वात करण्यात येत आहे.