‘सन 2004 च्या राज्य निवडणूक आयोगाच्या स्थायी आदेशानुसार ज्या ठिकाणी उमेदवार बिनविरोध निवडून आले आहेत, त्याबाबतचा अहवाल आयोगाला सादर करावा लागतो. त्यानुसार संबंधित महापालिका आयुक्तांना अहवाल सादर करण्याबाबत सूचना देण्यात आल्या आहेत. यात चौकशीचा प्रश्न नाही,’ असे राज्य निवडणूक आयुक्त दिनेश वाघमारे यांनी शनिवारी सांगितले. ‘एखादा उमेदवार बिनविरोध निवडून आल्याचे जाहीर करण्यापूर्वी संबंधित निवडणूक निर्णय अधिकाऱ्याला राज्य निवडणूक आयोगाला अहवाल सादर करावा लागतो. अहवाल देण्यापूर्वी निवडणूक निर्णय अधिकाऱ्याने बिनविरोध निवडीबाबत प्रक्रिया पार पाडली किंवा संबंधित उमेदवाराला निवडून आल्याचे प्रमाणपत्र दिले असेल, तर नियमानुसार कारवाई केली जाईल,’ असं एका अधिकाऱ्यानं स्पष्ट केलं.

‘बिनविरोध’विरोधात मनसे न्यायालयात जाणार

राज्यातील महानगरपालिका निवडणुकीत महायुतीचे अनेक उमेदवार बिनविरोध निवडून आल्याबद्दल राजकीय वर्तुळात सर्वत्र चर्चेचा विषय ठरला असतानाच याविरोधात आता विरोधकांनी आक्रमक पवित्रा धारण केला आहे. याविरोधात महाराष्ट्र नवनिर्माण सेना न्यायालयात जाणार आहे, असे पक्षाचे नेते अविनाश जाधव यांनी शनिवारी सांगितले.

महाराष्ट्र नवनिर्माण सेनेच्या नेतेमंडळींची विशेष बैठक मुंबईत आयोजित करण्यात आली होती. या बैठकीनंतर पत्रकारांशी बोलताना जाधव यांनी ही माहिती दिली. तर ‘राज्यातील विविध महापालिकांमध्ये 60 हून अधिक नगरसेवक बिनविरोध निवडून आले आहेत. हा प्रकार वेळीच थांबला नाही, तर भविष्यात निवडणुकाच होणार नाहीत,’ अशी भीती त्यांनी व्यक्त केली.