खालीद खलील कुरेशी (वय २३, रा. सय्यदनगर, हडपसर) असे अटक करण्यात आलेल्या आरोपीचे नाव आहे. एका ज्येष्ठ नागरिकाला रामटेकडी औद्योगिक वसाहतीजवळ गेल्या महिन्यात निर्जन रस्त्यावर चौघांनी अडवून मारहाण करून त्यांच्या गळ्यातील सोनसाखळी हिसकावून दुचाकीवरून पळ काढला होता. या प्रकरणी वानवडी पोलिस ठाण्यात गुन्हा दाखल झाला होता.

तपासादरम्यान उमर नूर खान आणि साहील हबीब फकीर या दोन आरोपींना अटक करून सोनसाखळी आणि गुन्ह्यात वापरलेली दुचाकी जप्त करण्यात आली. मात्र, या गुन्ह्याचा मुख्य सूत्रधार खालिद कुरेशी फरारी होता. पोलिस अंमलदार सर्फराज देशमुख यांना मिळालेल्या माहितीच्या आधारे ३० डिसेंबर रोजी वानवडी पोलिसांनी हांडेवाडी परिसरात सापळा रचून त्याला ताब्यात घेतले. त्याला न्यायालयाने पोलिस कोठडी सुनावली. चौकशीत कुरेशी याने पुण्यातील दोन साथीदारांसह सुपारी घेऊन खोपोली येथील माजी नगरसेवक मंगेश काळोखे यांचा खून केल्याची कबुली दिली. जबरी चोरीच्या तपासातून वानवडी पोलिसांनी थेट खुनाचा गुन्हा उघडकीस आणला.अतिरिक्त पोलिस आयुक्त मनोज पाटील, परिमंडळ पाचच्या उपायुक्त राजलक्ष्मी शिवणकर, वरिष्ठ निरीक्षक भाऊसाहेब पाटील यांच्या मार्गदर्शनाखाली उपनिरीक्षक अल्फाज शेख, अंमलदार सर्फराज देशमुख, महेश गाढवे, दया शेगर यांच्या पथकाने ही कारवाई केली.

Ravindra Chavan: महायुतीत वादाची ठिणगी; अजित पवारांबाबत मुख्यमंत्र्यांना सल्ला दिल्याचा रवींद्र चव्हाणांचा गौप्यस्फोट
मंगेश काळोखे खून प्रकरण
काळोखे हे त्यांच्या मुलाला शाळेत सोडण्यासाठी गेले होते. तेथून परतत असताना आरोपींना त्यांना रस्त्यात गाठत त्यांच्यावर सपासप वार केले. त्यानंतर आरोपी पसार झाले. जखमी काळोखेंना रुग्णालयात नेण्यात आले. मात्र, डॉक्टरांनी त्यांना मृत घोषित केले होते.

न्यायालयाने आरोपीची रवानगी आता न्यायलयीन कोठडीत केली असून, खोपोली येथील स्थानिक पोलिसांनी आरोपीचा ताबा घेण्यासाठी कायदेशीर प्रक्रिया सुरू केली आहे. काळोखे यांच्या खुनात सहभागी असलेले आरोपीसोबतचे अन्य दोघेही पुण्याचेच असून, त्यांचाही शोध घेतला जात आहे. –राजलक्ष्मी शिवणकर, पोलिस उपायुक्त, परिमंडळ पाच