पांढरीकर आणि काशिकर कुटुंबातील पाचजण कोल्हापूरहून टाटा नेक्सन कारने गुरूवारी महाबळेश्वरात आले होते. दुपारी प्रतापगडाकडे जात असताना आंबेनळी घाटात एका वळण रस्त्यावरील तीव्र उतारावर चालकाचे गाडीवरील नियंत्रण सुटल्याने कार १०० फूट खोल दरीत कोसळली. या अपघाताची माहिती मिळताच प्रतापगड आणि महाबळेश्वर रेस्क्यू टीम तात्काळ घटनास्थळी दाखल झाल्या. टीमच्या सदस्यांनी दरीत उतरून बचाव कार्याला सुरुवात केली. घनदाट झाडी मदतकार्यात अडसर ठरत असतानाही रेस्क्यू टीमने विविध साहित्याच्या माध्यमातून जखमींना दरीतून वर काढून महाबळेश्वर ग्रामीण रूग्णालयात दाखल केले.

​ठाकरे बंधू एकत्र येताच जुन्या शिलेदाराचा ‘एल्गार’! प्रकाश महाजनांचा शिंदेंच्या शिवसेनेत प्रवेश; महापालिका निवडणुकीत तोफ धडाडणार

११ वर्षीय मुलाने…

अपघातानंतर कारमधील ११ वर्षीय मुलाने प्रसंगावधान राखत ११२ या आपत्कालीन क्रमांकावर संपर्क साधून अपघाताची माहिती दिली. फोनवर लहान मुलाचा आवाज ऐकून सुरुवातीला अपघात बसचा झालाय की काय, असा संभ्रम निर्माण झाला. तसेच अपघाताचे नेमके ठिकाण न समजल्यामुळे शोधकार्याला उशीर झाला. अपघातस्थळ शोधण्यापासूनच मदतकार्याला सुरुवात करावी लागली. त्यानंतर बचावकार्याला वेग आला.

बचाव मोहिमेत महाबळेश्वर ट्रेकर्सचे सुनील भाटिया, अमित कोळी, सुजित कोळी, सुनील केळगने, दीपक ओंबळे तसेच प्रतापगड सर्च अँड रेसक्यू टीमचे अनिकेत वागदरे, आशिष बिरामणे, ऋषिकेश जाधव, संकेत सावंत, अजित जाधव, आदित्य बावळेकर, ओंकार शेलार साई हवालदार हे सहभागी झाले होते. आंबेनळी घाटात यापुर्वीही अनेक भीषण अपघात झाले आहेत. अपघात टाळण्यासाठी घाटात अनेक उपाययोजना करण्यात आल्या आहेत. परंतु, त्या तकलादू असल्याने अपघातांचे सत्र सुरूच आहे.