राज्यात नुकत्याच झालेल्या नगरपंचायत निवडणुकीत चंद्रपूर नगर पालिकेत भारतीय जनता पक्षाला पराभवाचा फटका बसला. पक्षाचा हा पराभव सुधीर मुनगंटीवार यांना जोरदार धक्का मानला जात होता. या पराभवानंतर मुनगंटीवार यांनी स्थानिक नेत्यांच्या कामकाजावर जोरदार टीकाही केली होती. या टीकेनंतर भाजपमधील अंतर्गत वाद चव्हाट्यावर आला होता.

चर्चा विकासात्मक मुद्द्यांवर

मुख्यमंत्र्यांशी विविध विकासात्मक विषयांवर सविस्तर चर्चा झाल्याचे सुधीर मुनगंटीवार यांनी स्पष्ट केले. यावेळी शेतकऱ्यांना धानाचा प्रति हेक्टर २० हजार बोनस, आधारभूत धान खरेदी नोंदणीची अंतिम तारीख ३१ जानेवारीपर्यंत वाढविणे, अतिवृष्टीमुळे झालेल्या शेती नुकसानीसाठी विशेष बाब म्हणून ३ हेक्टरपेक्षा अधिक क्षेत्रधारक शेतकऱ्यांना मदत, तसेच बल्लारपूर येथे ईएसआयसी रुग्णालय, राज्य राखीव पोलिस दल व महिला सहकारी औद्योगिक वसाहतीसाठी मौजा विसापूर येथील बंद असलेल्या पॉवर हाऊसची ३१.३५ हेक्टरमधील जागा उपलब्ध करून देण्यासंदर्भात आग्रही मागणी केली.

शिंदे-चव्हाण यांच्यात चर्चा

आगामी महापालिका निवडणुकांमध्ये भाजप-शिवसेना युतीच्या जागावाटपासंदर्भात मंगळवारी रात्री उशिरा उपमुख्यमंत्री एकनाथ शिंदे आणि भाजपचे प्रदेशाध्यक्ष रवींद्र चव्हाण यांच्यात जवळपास पाच तास मॅरेथॉन चर्चा झाल्याचे समजते. मुंबई, ठाणे, कल्याण डोंबिवलीसह मुंबई महानगर क्षेत्रातील जागावाटपाचे सूत्र या चर्चेतून अंतिम टप्प्यात आल्याचे समजते. त्यामुळे येत्या दोन दिवसांत महायुतीच्या जागावाटपांचे सूत्र घोषित होणार असल्याचे समजते.