गेल्या वर्षी लोकसभा आणि विधानसभेच्या निवडणुका झाल्या. लोकसभेत महायुतीनं सपाटून मार खाल्ला. मुंबईतही त्यांची पिछेहाट झाली. महाविकास आघाडीनं राज्यात ४८ पैकी ३० जागा जिंकल्या. मुंबईतील ६ पैकी ४ जागा मविआनं खिशात घातल्या. तर महायुतीला केवळ २ जागांवर समाधान मानलं. विधानसभा निवडणुकीत चित्र पूर्णपणे पालटलं. महाविकास आघाडीचा सुपडासाफ करत महायुतीनं विजय मिळवला. मुंबईतही महायुती वरचढ ठरली. त्यावेळी झालेल्या मतदानाच्या पॅटर्नचा अभ्यास करुन व्होट वाईब इंडियाच्या अमिताभ तिवारी यांनी काही आकडे एक्सवर पोस्ट केले आहेत.
ठाकरे बंधूंना शिंगावर घेण्याची भाईंची तयारी; पण ‘त्या’ जागा नकोशा, भाजपलाही लढण्यात रस वाटेना
मुंबईत विधानसभेच्या एकूण ३६ जागा आहेत. यातील २२ जागा महायुतीनं, तर १४ जागा महाविकास आघाडीनं जिंकल्या. मुंबई शहरात पालिकेचे २२७ प्रभाग आहेत. यापैकी ९४ प्रभागांमध्ये महाविकास आघाडी पुढे होती. तर महायुतीनं १३३ प्रभागांमध्ये आघाडी राखली. मुंबईत भाजपनं १५, शिंदेसेनेनं ६, अजित पवारांच्या राष्ट्रवादी काँग्रेसनं १ जागा जिंकली होती. तर ठाकरेसेनेनं १०, काँग्रेसनं ३, समाजवादी पक्षानं १ जागा खिशात घातली. महायुती आणि मविआनं जिंकलेल्या जागा आणि त्यांना प्रभागांमधील असलेली आघाडी यांचं गणित मांडून व्होट वाईब इंडियाचे संस्थापक अमिताभ तिवारी यांनी पालिका निवडणुकीचा अंदाज वर्तवला आहे.
आता थेट नाही, लेट! भाजपची रणनीती; शिंदेंच्या ‘स्ट्राईक रेट’वरच स्ट्राईक करण्याची तयारी; भाई सावध
गेल्या वर्षी झालेल्या विधानसभा निवडणुकीचा व्होटिंग पॅटर्न कायम राहिल्यास भाजप आणि शिंदेसेनेला ११४ जागा मिळण्याचा अंदाज आहे. तर शिवसेना उबाठा आणि मनसे ७९ जागांपर्यंत मजल मारु शकते. राष्ट्रवादी काँग्रेस (अजित पवार) ५, तर काँग्रेसला १९ जागा मिळू शकतात. तर १० जागा अन्य पक्षांच्या खात्यात जाऊ शकतात. मुंबई महापालिकेत २२७ प्रभाग असल्यानं सत्ता स्थापनेसाठी ११४ हा जादुई आकडा आहे. महायुती नेमका हाच आकडा गाठताना दिसते. याचा अर्थ विधानसभेच्या निवडणुकीचा व्होटिंग पॅटर्न कायम राहिल्यास महायुती काठावरचं बहुमत मिळवू शकते.