पहाटे ५ पर्यंत चालणार जल्लोष!

२०२४ वर्षाला ‘बाय-बाय’ आणि नववर्षाचं 2025 दणक्यात स्वागत करण्यासाठी पुणेकर सज्ज झाले आहेत. थंडीच्या गुलाबी हवेत पुणेकरांच्या उत्साहाला उधाण आलं असून, या सेलिब्रेशनमध्ये पुणे पोलिसांनीही ‘गुड न्यूज’ दिली आहे. मात्र, या आनंदावर निवडणुकीच्या आचारसंहितेची ‘करडी नजर’ असल्याने यंदाचा ‘थर्टी फर्स्ट’ जरा सांभाळूनच साजरा करावा लागणार आहे. पुणेकरांच्या उत्साहावर पाणी फेरले जाऊ नये म्हणून, राज्य उत्पादन शुल्क विभागाने दिलासादायक निर्णय घेतला आहे. २४ (नाताळ पूर्वसंध्या), २५ (नाताळ) आणि ३१ डिसेंबर या तीन दिवशी शहरातील पब, बार, क्लब आणि रेस्टॉरंट्सना थेट पहाटे ५ वाजेपर्यंत सुरू ठेवण्यास परवानगी देण्यात आली आहे. इतकंच नाही, तर तळीरामांची सोय म्हणून वाईन शॉप्सही रात्री १ वाजेपर्यंत उघडी राहणार आहेत. त्यामुळे पुण्यातल्या पार्ट्या यंदा पहाटेपर्यंत रंगणार, हे नक्की!

‘चिअर्स’ करताना भान ठेवा, कारण निवडणूक आलीय

एकीकडे सेलिब्रेशनचा मूड असला, तरी दुसरीकडे राज्यात २९ महानगरपालिकांच्या निवडणुकांचे बिगुल वाजले आहे. उमेदवारी अर्ज भरण्याची प्रक्रिया सुरू झाली असून, राज्यात कडक आचारसंहिता लागू आहे. त्यामुळे यंदा पोलिसांसोबतच निवडणूक आयोगाच्या भरारी पथकांचीही पार्टीवर गस्त असणार आहे.

मोठी बातमी: मंत्री नितेश राणे अन् भाजपच्या बड्या नेत्यांना न्यायालयाचा दणका, थेट अटकेचे आदेश; नेमकं प्रकरण तरी काय?

विना परवाना…

पोलिसांनी स्पष्ट केले आहे की, केवळ वेळ वाढवून मिळाली म्हणून नियम धाब्यावर बसवता येणार नाहीत.मद्य परवाना अनिवार्य करण्यात आला आहे. पार्टी करण्यापूर्वी किंवा मद्य खरेदी करण्यापूर्वी अधिकृत परवाना (Permit) जवळ बाळगणे बंधनकारक असेल.

ड्रंक अँड ड्राईव्ह

पिऊन गाडी चालवणाऱ्यांची खैर नाही, शहरात जागोजागी नाकाबंदी असेल आणि ड्रंक अँड ड्राईव्हची धडक मोहीम राबवली जाईल. त्यामुळे पुणेकरांनो, नववर्षाचं स्वागत करताना पहाटेपर्यंत जरूर नाचगाणी करा, पण ‘आचारसंहितेचा’ विसर पडू देऊ नका. अन्यथा, सेलिब्रेशनचा ‘हँगओव्हर’ उतरवायला पोलीस सज्ज आहेत!