अजित पवारांचा किल्ला बारामतीत ढासळला; युवक आणि अपक्ष उमेदवारांनी शहरात मोठा स्विंग घडवला.
बारामतीकरांनी अजित पवारांना जणू राजकीय ‘षटकार’ लगावत हे निकाल दिले, अशी जोरदार चर्चा शहरात आहे.
सर्वाधिक लक्ष वेधणारा निकाल लागला तो ज्या प्रभागात राष्ट्रवादीचे ज्येष्ठ नेते किरण गुजर यांचे बंधू जितेंद्र गुजर मैदानात होते. त्या प्रभागाचा भाजपपासून काँग्रेसपर्यंत सर्वांचेच लक्ष या लढतीकडे लागले होते. मात्र येथे युवा उमेदवार यशपाल सुनील पोटे यांनी जबरदस्त धक्का देत ‘जायंट किलर’ ठरत गुजर यांना पराभूत केले. हा निकाल अपेक्षित असला तरी शहरभर चर्चेचा विषय ठरला. परंतु खरी धक्कादायक घडामोड झाली ती इतर चार प्रभागांत. अजित पवारांच्या राष्ट्रवादी काँग्रेसकडील ‘निश्चित विजयाचे’ म्हणून गणले जाणारे हे प्रभाग मतदारांनी अक्षरशः उलथून टाकले.
अजित पवार गटाच्या महिला शहराध्यक्ष अनिता गायकवाड यांना अनपेक्षित पराभव स्वीकरावा लागला. येथे अपक्ष संपदा बनकर यांनी जोरदार कामगिरी करत विजय मिळवला. प्रभाग क्रमांक १४ मध्ये तर निवडणुकीची सर्वात रोमहर्षक लढत पाहायला मिळाली. येथे सर्वोच्च न्यायालयात वकिली करणारी बहुजन समाज पार्टीची तरुण उमेदवार संघमित्रा काळुराम चौधरी हिने अजित पवारांच्या राष्ट्रवादीच्या उमेदवार स्वाती आप्पासाहेब अहिवळे यांचा दणदणीत पराभव करत मोठी बाजी मारली.
Baramati Election Result: बालेकिल्ल्यात अजित दादांना मतदारांचा राजकीय ‘षटकार’, बारामतीकरांनी दिला अनपेक्षित धक्का
संघमित्रांचे वडील काळुराम चौधरी हे स्वतः नगराध्यक्ष पदाचे उमेदवार राहिले होते. यामुळे या विजयाला अधिक प्रतीकात्मक महत्त्व आहे. दरम्यान, राष्ट्रवादी काँग्रेस (शरदचंद्र पवार गट)च्या माजी नगरसेविका आरती शेंडगे यांनीही आपल्या प्रभागातून निर्णायक विजयाची नोंद केली. तर राष्ट्रीय समाज पक्षाच्या वनिता अमोल सातकर यांनी राष्ट्रवादीच्या बलाढ्य पदाधिकाऱ्यांच्या मुलीचा पराभव करून स्वतःची वेगळी छाप पाडली.
अजित पवारांनी विरोधकांना आपल्या पक्षात सामावून घेऊन विरोध संपवण्याचा प्रयत्न केला होता, परंतु मतदारांनी मात्र मतपेटीतूनच वेगळा संदेश देत राष्ट्रवादी (अजित पवार गट) ला ठोस इशारा दिला. यामध्ये अपक्ष उमेदवार निलेश इंगुले यांचा विजय सर्वाधिक चर्चेत राहिला. माजी नगरसेवक असलेल्या इंगुले यांनी अपक्ष म्हणून रिंगणात उतरून थेट राष्ट्रवादीला धक्का देत आपली ताकद सिद्ध केली. त्यांच्या विजयाने राष्ट्रवादीची मोठी ‘हाराकिरी’ झाल्याची चर्चा शहरात आहे.
एकूणच, अजित पवारांची पॉवर कायम असली तरीही या सहा ठिकाणांवर त्यांना मोठा फटका बसला आहे. बारामतीच्या या निवडणुकीत मतदारांनी पवारांच्या परंपरागत सत्ता समीकरणांवर मोठा स्विंग मारत शहराच्या राजकारणाला नवी दिशा दिली आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा