15 जानेवारी रोजी घडलेल्या या संतापजनक घटनेत फिर्यादी आपल्या अल्पवयीन बहिणीची छेडछाड केल्याबाबत आरोपीला जाब विचारण्यासाठी विद्या प्रतिष्ठान कॉलेज परिसरात गेला होता. त्यावेळी आरोपींनी त्याला हातातील लोखंडी कडं आणि लोखंडी कोयत्याने मारहाण करून गंभीर जखमी केलं होतं. या प्रकारामुळे परिसरात मोठी खळबळ उडाली होती.
Jalgaon Crime : पाच दिवसापासून तरुण बेपत्ता; कुटुंबियांकडून शोधाशोध, अखेर पोलीस तपासात भयंकर समोर, एका संशयाने…
या घटनेप्रकरणी बारामती तालुका पोलीस ठाण्यात बी.एन.एस कलम 118 (2), 115 (2), 74, 75, 78 तसंच बालकांचं लैंगिक अपराधापासून संरक्षण अधिनियम कलम 8 आणि 12 अंतर्गत गुन्हा दाखल करण्यात आला होता. या गुन्ह्यातील मुख्य आरोपी गौरव दिलीप टेंगले (रा. म्हसोबाचीवाडी, पणधरे, ता. बारामती, जि. पुणे) हा गेल्या एक वर्षापासून पोलिसांना गुंगारा देत फरार होता. मात्र गुन्ह्याचं गांभीर्य लक्षात घेऊन पोलीस निरीक्षक चंद्रशेखर यादव आणि त्यांच्या टीमने गुप्त माहितीच्या आधारे 19 डिसेंबर रोजी एमआयडीसी परिसरातून आरोपीला अटक करत त्याच्या मुसक्या आवळल्या.

धक्कादायक बाब म्हणजे अटक करण्यात आलेल्या आरोपीवर यापूर्वीही भिगवण पोलीस ठाणे, बारामती तालुका पोलीस ठाणे आणि बारामती शहर पोलीस ठाणे इथे गंभीर स्वरूपाचे अनेक गुन्हे दाखल असल्याचं समोर आलं आहे. त्यामुळे पोलीस त्याचा कसून शोध घेत होते. अखेर वर्षभरापासून फरार गुन्हेगाराला पोलिसांनी ताब्यात घेतलं. त्यांच्या या कारवाईमुळे महिलांवरील अत्याचार आणि गुन्हेगारी प्रवृत्तीविरोधात पोलिसांची भूमिका पुन्हा एकदा अधोरेखित झाली आहे.