नगरपरिषदेच्या मतदान प्रक्रियेदरम्यान झालेली हाणामारी

गेल्या 2 डिसेंबर रोजी गेवराई नगरपरिषदेच्या मतदान प्रक्रियेदरम्यान दोन राजकीय गट समोरासमोर आले होते. माजी आमदार लक्ष्मण पवार आणि माजी आमदार अमरसिंह पंडित यांच्या समर्थकांमध्ये यावेळी मोठी हाणामारी झाली होती. या संघर्षात बाळराजे पवार यांनी अमरसिंह पंडित यांचे स्वीय सहाय्यक अमृत डावकर यांना मारहाण केल्याचा आरोप आहे. मात्र बाळराजे पवार ही रात्री स्वतःहून गेवराई पोलीस ठाण्यात हजर झाल्याचे सांगण्यात आले.
Beed News : उलटीचा त्रास झाल्याने 13 वर्षीय संस्कृतीला रुग्णालयात नेलं, पण तिथं विपरीत घडलं; कुटुंबाने डॉक्टरांवर केले गंभीर आरोप

पोलिसांची कारवाई आणि गुन्ह्यात वाढ

या राड्यानंतर गेवराई पोलिसांनी परिस्थितीचे गांभीर्य ओळखून स्वतःहून (सुमोटो) दखल घेत सुमारे 50 जणांविरुद्ध गुन्हे दाखल केले होते. सुरुवातीला अनेक आरोपींना ताब्यात घेऊन नोटीस बजावण्यात आली होती. मात्र, तपासादरम्यान बाळराजे पवार यांच्यावरील आरोपांची व्याप्ती आणि गुन्ह्यातील कलमांमध्ये वाढ झाल्याने पोलिसांनी कठोर पाऊल उचललं.

पोलीस ठाण्यात बंदोबस्त वाढवला

अटकेच्या पार्श्वभूमीवर गेवराई शहरात आणि पोलीस ठाणे परिसरात मोठा पोलीस बंदोबस्त तैनात करण्यात आला आहे. गेवराईत पवार आणि पंडित या दोन दिग्गज नेत्यांमधील राजकीय वैर सर्वश्रुत आहे. मात्र, थेट कुटुंबातील सदस्याला अटक झाल्याने आता हा वाद अधिक चिघळण्याची शक्यता वर्तवली जात आहे. भाजप समर्थकांकडून या कारवाईचा निषेध केला जाण्याची शक्यता असून, खबरदारी म्हणून ठाणे परिसरात बंदोबस्त वाढवला आहे.

राजकीय वातावरण तापण्याची शक्यता

नगरपरिषद निवडणुकीच्या दिवशी मतदान केंद्रांवर प्रचंड गर्दी आणि तणाव होता. गेवराईत पवार आणि पंडित या दोन गटांत नेहमीच राजकीय चुरस असते. मतदान केंद्राबाहेर बाचाबाची सुरू झाली आणि त्याचे रूपांतर हाणामारीत झाले. बाळराजे पवार यांनी थेट अमरसिंह पंडितांच्या पीएला लक्ष्य केल्याने प्रकरण गंभीर बनले. त्यामुळे गेवराई पुन्हा एकदा राजकीय वातावरण तापण्याची शक्यता निर्माण झाली आहे.