सुप्रीम कोर्टाने याआधीच राज्य निवडणूक आयोगाला 31 जानेवारी 2026 च्या आधी निवडणुका घेण्याचा आदेश दिला आहे. त्यामुळे राज्य निवडणूक आयोगाकडून आता दुसऱ्या टप्प्यातील निवडणुकीची घोषणा झाली आहे. राज्यातील मुंबई, पुणे, ठाणे, नागपूर, नवी मुंबई, छत्रपती संभाजीनगर शहरांसह एकूण 29 महत्त्वाच्या शहरांमधील महापालिकांच्या निवडणुका जाहीर झाल्या आहेत. गेल्या अनेक वर्षांपासून या निवडणुका रखडल्या आहेत. पण आता या निवडणुका होणार आहेत. राज्य निवडणूक आयोगाचे अध्यक्ष दिनेश वाघमारे यांनी आज पत्रकार परिषद घेत निवडणूक कार्यक्रम जाहीर केला.

“आजच्या पत्रकार परिषदेत मुदत संपलेल्या स्थानिक स्वराज्य संस्थांच्या निवडणुका या 31 जानेवारी 2026 च्या अखेर पर्यंत घेण्याचं नियोजन आणि त्या दृष्टीकोनाने केलेलं नियोजन याबाबत माहिती देण्यासाठी ही पत्रकार परिषद आयोजित केली आहे. मला आपल्याला सांगावसं वाटतं की, ही पत्रकार परिषद राज्यातील महापालिका निवडणुकांसाठी आहे. महाराष्ट्रातील 29 महापालिकांच्या निवडणुकीबाबत ही पत्रकार परिषद आहे. त्यापैकी 27 महापालिकांची मुदत संपलेली आहे. 2020 मध्येच मुदत संपली होती. मुंबईसह 18 महापालिकांची 2022 मध्ये मुदत संपली होती. 4 महापालिकांची मुदत 2023 मध्ये संपली होती. जालना आणि इचलकरंजी या नवनिर्वाचित महापालिका आहेत. त्यांची सुद्धा मी माहिती सांगणार आहे”, असं आयुक्त दिनेश वाघमारे म्हणाले.

मुंबई महापालिका वगळता इतर ठिकाणी 3 ते 5 उमेदवारांना मतदान करावं लागणार

“मुंबई महापालिकेत प्रभागात एक सदस्यीय प्रभाग आहे. मुंबई महापालिकेसाठी प्रत्येक मतदाराला केवळ 1 मत द्यावं लागेल. तर 28 महापालिका या बहु सदस्यीय आहेत. बहुतांश महापालिकेत एका प्रभागात 4 उमेदवार निवडून द्यायचे आहेत. त्या महापालिकेत काही प्रभाग असेल आहेत की, जिथे 3 उमेदवार असतील तर काही प्रभागात 5 उमेदवार असतील. त्यामुळे या 28 महापालिकांमध्ये मतदारांना साधारणपणे 3 ते 5 मते द्यावे लागतील”, अशी महत्त्वाची माहिती देखील त्यांनी दिली.

निवडणुकांचा कार्यक्रम कसा असेल?

“29 महापालिकांच्या निवडणुकांसाठी नामनिर्देश पत्र स्वीकारण्याचा कालावधी हा 23 डिसेंबर ते 30 डिसेंबर 2025 असणार आहे. या नामनिर्देशन पत्राची छाननी 31 डिसेंबर 2025 ला होणार आहे. उमेदवारी माघारीची मुदत ही 2 जानेवारी 2026 अशी असणार आहे. तर निवडणूक चिन्ह वाटप आणि अंतिम उमेदवारांची यादी 3 जानेवारी 2026 ला होईल. या महापालिकांसाठी मतदान 15 जानेवारी होईल. तर 16 जानेवारी 2026 ला मतमोजणी होईल”, अशी माहिती राज्य निवडणूक आयोगाचे आयुक्त दिनेश वाघमारे यांनी दिली.

कोणकोणत्या महापालिकांमध्ये निवडणूक होणार?

मुंबई MMRDA विभाग :

• मुंबई
• नवी मुंबई
• ठाणे
• कल्याण-डोंबिवली
• वसई-विरार
• भिवंडी
• मीरा-भाईंदर
• उल्हासनगर
• पनवेल

पश्चिम महाराष्ट्र विभाग:

• पुणे
• पिंपरी-चिंचवड
• कोल्हापूर
• सांगली
• सोलापूर
• इचलकरंजी

उत्तर महाराष्ट्र विभाग :

• नाशिक
• अहिल्यानगर
• धुळे
• जळगाव
• मालेगाव

मराठवाडा विभाग :

• छत्रपती संभाजीनगर
• लातूर
• नांदेड-वाघाडा
• परभणी
• जालना

विदर्भ विभाग :

• नागपूर
• अकोला
• अमरावती
• चंद्रपूर