वाकुर्डे बुद्रुक येथील आनंदा आणि वसंत मोरे हे शेतकरी कुटुंब आपल्या कष्टाळू स्वभावासाठी ओळखले जाते. शनिवारी उसाच्या तोडणीनंतर रान मोकळे करण्यासाठी दोन्ही भाऊ नेहमीप्रमाणे शेतातील पाचोळा जाळण्याचे काम करत होते. सायंकाळची वेळ होती आणि काम वेगाने सुरू होते. मात्र, याच वेळी नियतीने आपला क्रूर डाव साधला. अचानक सोसाट्याचा वारा सुटला आणि बघता बघता आगीने रौद्र रूप धारण केले. काही कळायच्या आतच आगीच्या ज्वाळांनी दोन्ही भावांना चारही बाजूंनी वेढले.

समृद्धीवर टायरने केला घात! पाटोळे शिवारानजीक भीषण अपघात; किया कारचा चेंदामेंदा, 8 चिमुकल्यांसमोरच दोघांचा करुण अंत!

धुराचे साम्राज्य आणि आगीची धग यामुळे त्यांना बाहेर पडण्याचा मार्ग सापडणे कठीण झाले. त्यांच्या किंकाळ्या ऐकून आसपासच्या गावकऱ्यांनी आणि शेतकऱ्यांनी घटनास्थळी धाव घेतली. जीवाची बाजी लावून गावकऱ्यांनी आग आटोक्यात आणली आणि दोन्ही गंभीर जखमी भावांना तातडीने शिराळा येथील उपजिल्हा रुग्णालयात दाखल केले.

मात्र, काळाने आनंदा मोरे यांच्यावर झडप घातलीच होती. डॉक्टरांनी शर्थीचे प्रयत्न करूनही उपचारादरम्यान आनंदा मोरे यांची प्राणज्योत मालवली. घरातील कर्ता पुरुष, मुलांचा बाप आणि भावाचा आधारवड एका क्षणात कोसळल्याने मोरे कुटुंबाचा आक्रोश काळीज चिरणारा होता. दुसरीकडे, वसंत मोरे यांची प्रकृती अत्यंत चिंताजनक असून त्यांच्यावर अतिदक्षता विभागात उपचार सुरू आहेत.

शेतातील आग विझली असली तरी मोरे कुटुंबाच्या आयुष्यातील सुखाची राखरांगोळी झाली आहे. कष्टाने पिकवलेल्या रानातच शेतकऱ्याचा असा दुर्दैवी अंत झाल्याने वाकुर्डे बुद्रुक गावावर शोककळा पसरली आहे. संपूर्ण गाव सध्या वसंत मोरे यांच्या प्रकृतीत सुधारणा व्हावी, यासाठी प्रार्थना करत आहे.