नेमकं प्रकरण काय?

गौरव महेश नायडू (वय 25, रा. पिंपरी-चिंचवड) असे जामीन फेटाळलेल्या आरोपीचे नाव आहे. त्याच्याविरोधात 24 वर्षीय पीडितेने बाणेर पोलिस ठाण्यात तक्रार दिली होती. ही घटना 29 ऑगस्ट रोजी सकाळी पावणेदहाच्या सुमारास बाणेर येथील एका खासगी प्रशिक्षण संस्थेच्या आवारात घडली. तक्रारदार तरुणी ‘एमबीए’चे शिक्षण घेत असून, एका खासगी संस्थेत कौशल्य विकासाचे प्रशिक्षण घेत होती. दोन वर्षांपूर्वी तिची एका मित्राच्या माध्यमातून गौरवशी ओळख झाली. त्यांच्या मैत्रीचे रुपांतर प्रेमसंबंधात झाले. मात्र, गौरवविरोधात खुनाचा प्रयत्न केल्याप्रकरणी 2021 मध्ये वाकड पोलिस ठाण्यात गुन्हा दाखल असून तो येरवडा कारागृहात असल्याचे कळल्यावर तिने त्याच्याशी बोलणे बंद केले. त्यामुळे गौरवने संतापून तिच्यावर पिस्तुलातून तीन वेळा गोळीबार करण्याचा प्रयत्न केला. मात्र, पिस्तुलातून गोळ्या न सुटल्याने तिचा जीव वाचला. तरुणीने आरडाओरडा केल्यानंतर गौरव दुचाकीवरून पसार झाला. पोलिसांनी खडकी रेल्वे स्थानकाजवळ गौरवला पकडले असता, त्याच्या दुचाकीच्या डिक्कीतून देशी देशी बनावटीचे पिस्तूल आणि तीन जिवंत काडतुसेही जप्त करण्यात आली.
कोर्टात फरार घोषित! Nilesh Ghaywal याच्यावर आतापर्यंतची सर्वात कठोर कारवाई होण्याची दाट शक्यता

तरुणीवर पुन्हा हल्ला…

या प्रकरणात न्यायालयीन कोठडीत असलेल्या गौरवने जामीन मिळण्यासाठी न्यायालयात अर्ज केला. त्याला सरकारी वकील जावेद खान आणि तक्रारदार तरुणीचे वकील अॅड. खंडेराव टाचले यांनी विरोध दर्शविला. आरोपीने नियोजनबद्ध पद्धतीने तरुणीवर जीवघेणा हल्ला केला असून, त्याची पार्श्वभूमी गुन्हेगारीची आहे. त्याला जामीन मंजूर झाल्यास तो तरुणीवर पुन्हा हल्ला करून साक्षीपुराव्यात छेडछाड करू शकतो, असा युक्तिवाद सरकारी वकील आणि तक्रारदार तरुणीच्या वकिलांनी केला. तो ग्राह्य धरत न्यायालयाने आरोपीचा जामीन फेटाळला.