साईप्रसाद महेंद्रकर, कोल्हापूर: महामार्गावरील वेगावर नियंत्रण सुटल्यामुळे सातत्याने अपघातांना निमंत्रण दिलं जात आहे. अशाच पद्धतीने चार विद्यार्थिनींना घेऊन भरधाव वेगाने जाणाऱ्या एका चारचाकीने पाठीमागून येऊन रस्त्याकडेला थांबलेल्या एका टेम्पोला जोराची धडक दिली आहे. या अपघातात कारमधील एका विद्यार्थिनीचा मृत्यू झाला असून एक विद्यार्थिनी गंभीर जखमी झाली आहे.
कोल्हापूर-सांगली महामार्गावर माले फाट्याजवळ सोमवारी सकाळी हा भीषण अपघात झाला. यामध्ये संजय घोडावत विद्यापीठातील 22 वर्षीय एमसीएची विद्यार्थिनी दिव्या कानिफनाथ भोसले (रा. नाणज, जि. सोलापूर. सध्या रा. राजारामपूरी, कोल्हापूर) हिचा उपचारादरम्यान मृत्यू झाला. तर तिची मैत्रीण देविका भुते ही गंभीर जखमी असून, कोल्हापुरातील खासगी रुग्णालयात तिच्यावर उपचार सुरू आहेत. भरधाव वेगाने चालवलेल्या भाड्याच्या इनोव्हा कारने (MH10 DW 0700) छोट्या हत्ती टेम्पोला (MH09 EM 6290) पाठीमागून जोरदार धडक दिल्याने हा अपघात झाला होता. यावेळी कार हवेत उडून तीन वेळा पलटी झाली. या अपघाताने परिसरात हळहळ व्यक्त होत आहे.
परीक्षेला जाणाऱ्या विद्यार्थिनीचा मृत्यू..
दिव्या भोसले ही मूळची सोलापूर येथील असून शिक्षणासाठी कोल्हापुरातील राजारामपुरी परिसरात राहते. तर देविका भुते ही तिची मैत्रीण सुद्धा तिच्यासोबत राहते. हातकणंगले तालुक्यातील अतिग्रे येथील संजय घोडावत विद्यापीठात एमसीए प्रथम वर्षाची परीक्षा सुरू आहे. त्यासाठी दिव्या भोसले आणि देविका भुते या दोघी अन्य दोन विद्यार्थिनी असे चार जण सकाळी 8.30 वाजता कोल्हापूरमधील राजारामपुरीतून निघाल्या होत्या. त्यांनी जाण्यासाठी भाड्याची इनोव्हा कार केली होती. कारचालक ईशान धुमाळ सुसाट वेगाने चालवत कार अतिग्रेकडे नेत होता. मात्र, माले फाट्यावर पुलाजवळ एक स्क्रॅप प्लास्टिक आणि काच बाटल्या यांनी भरलेला छोटा हत्ती टेम्पो थांबला होता. टेम्पोचालक विशाल गोसावी हा ओढ्यात बाटल्या गोळा करण्यासाठी गेला होता. त्यामुळे टेम्पोमध्ये कोणीही नव्हते. याच छोटा हत्ती टेम्पोला विद्यार्थिनींच्या कारने पाठीमागून धडक दिली आणि अपघात झाला.
धडकेत कार हवेत उडून तीनदा पलटी
धडक इतकी प्रचंड होती की, इनोव्हा कार हवेत उडाली आणि तीन वेळा उलटली. अपघातस्थळी रस्त्यावर काचांचा आणि प्लास्टिकचा थर पसरला होता, सायंकाळपर्यंत प्रचंड वाहतूक कोंडी झाली होती. जखमींना तात्काळ कोल्हापुरातील खासगी रुग्णालयात दाखल करण्यात आले. उपचारादरम्यान दिव्या भोसले या विद्यार्थिनीचा मृत्यू झाला, तर देविका भुते आणि कारचालकावर उपचार सुरू आहेत. दोन इतर विद्यार्थिनी सुदैवाने या अपघातात बचावल्या असून, मात्र त्यांना किरकोळ जखमा झाल्या आहेत.
वाढदिवसाचा प्लॅन, मात्र अपघाताने गाठले
चौघीजणी परीक्षेसाठी चार चाकी दोन निघाल्या होत्या. मात्र सोमवारी देविकाचा वाढदिवस होता. त्यामुळे परीक्षा झाल्यानंतर देविका भुते हिच्या वाढदिवसानिमित्त सर्वजण सेलिब्रेशनसाठी बाहेर पडणार होत्या. मात्र वाढदिवसाच्या आधीच त्यांना अपघाताने गाठल्यामुळे आनंदाच्या दिवसालाच विरजण लागले आहे.
नातेवाइकांचा मृतदेह ताब्यात घेण्यास नकार
अपघातानंतर हातकणंगले पोलिसांनी गुन्हा दाखल करण्यात उशीर केल्याने दिव्याच्या नातेवाईकांनी रुग्णालयातून मृतदेह ताब्यात घेण्यास नकार दिला होता. रात्री उशिरापर्यंत गुन्हा नोंदवला गेला नाही, अशी माहिती समोर आली आहे. नातेवाईकांनी पोलिसांवर गंभीर आरोप करत कारचालक ईशान धुमाळ आणि टेम्पो चालकाविरुद्ध कठोर कारवाईची मागणी केली आहे.
दरम्यान, नातेवाईक आणि मित्रमंडळी यांनी रुग्णालयाबाहेर धरणे धरून न्यायाची मागणी केली आहे. तर दिव्याच्या अकाली मृत्यूने सोलापूर आणि राजारामपुरी परिसरात कुटुंबीय, नातेवाईक आणि मित्रमंडळींमध्ये शोककळा पसरली आहे.