पश्चिम भारतामध्ये दोन ते तीन दिवसांमध्ये तापमानात दोन ते तीन अंश सेल्सिअसची घट होण्याची शक्यता आहे. त्याच वेळी विदर्भात तुरळक ठिकाणी सोमवार आणि मंगळवारी थंडीच्या लाटेचा इशारा देण्यात आला आहे. विदर्भात ठिकठिकाणी किमान तापमान १० अंशांखाली उतरल्याची रविवारी नोंद झाली. सांताक्रूझ येथे किमान तापमान २०.३ अंश, तर कुलाबा येथे २२.६ अंश सेल्सिअस नोंदले गेले. सांताक्रूझ येथील किमान तापमान सरासरीपेक्षा १.५ अंशांनी अधिक होते. हे तापमान सोमवारी १९, तर त्यानंतर बुधवारपर्यंत १७ अंशांपर्यंत खाली उतरू शकते.

गुरुवारी आणि शुक्रवारी हे तापमान १६ अंशांपर्यंत खाली जाऊ शकते, अशी शक्यता भारतीय हवामान विभागाने वर्तवली आहे. या काळात कमाल तापमानाचा पारा मात्र चढा असू शकेल. पुढील आठवडाअखेरपर्यंत मात्र कमाल तापमान ३४ अंशांपर्यंत पोहोचू शकते. मुंबईमध्ये रविवारीही कमाल तापमानाचा पारा चढा होता. सांताक्रूझ येथे ३३.९, तर कुलाबा येथे ३२.८ अंश सेल्सिअस कमाल तापमान नोंदले गेले. सांताक्रूझ येथे राज्यातील सर्वाधिक कमाल तापमान रविवारी नोंदले गेले.

मध्य महाराष्ट्र आणि मराठवाड्यातही थंडीची जाणीव होत आहे. मात्र या दोन्ही विभागांमध्ये किमान तापमान सरासीपेक्षा फारसे उतरलेले नाही. या विभागांमधील सर्वसाधारण तापमानाएवढे तापमान अनुभवायला मिळत आहे. पुणे, लोहगाव, अहिल्यागर, नाशिक, सातारा, सोलापूर येथे किमान तापमान सरासरीहून एक अंशाने किंवा अधिक चढे असल्याची नोंद रविवारी झाली. पुणे येथे १२.९, लोहगाव येथे १६.९, अहिल्यानगर येथे १२.५, सोलापूर येथे १७.९ किमान तापमान नोंदले गेले. मराठवाड्यात धाराशीव येथे १२.४, छत्रपती संभाजी नगर येथे १२.९, परभणी येथे ११.५, बीड येथे १२ अंश से. किमान तापमान नोंदले गेले. मराठवाड्यात धाराशीव, बीड, परभणी येथे सरासरीपेक्षा किमान तापमान काही अंशांनी कमी होते अशी नोंद झाली.