राज्य सरकारकडून मंजुरीनंतर मेट्रो लाईन 8 चा सविस्तर अहवाल तयार करण्यात आला असून, त्यात प्रस्तावित मार्ग आणि स्थानकांची माहिती दिली आहे. मानखुर्दहून वाशी खाडी पूल ओलांडल्यानंतर ही मेट्रो सायन–पनवेल महामार्गाला जोडेल. त्यानंतर नेरूळ, सीवूड्स, उलवे अशा भागांतून मार्ग जात थेट नवी मुंबई आंतरराष्ट्रीय विमानतळापर्यंत पोहोचेल. एमएमआरडीएच्या 337 किमी मेट्रो नेटवर्कमध्ये आता मेट्रो 8 चा समावेश करण्यात आला आहे.

मुंबई पाठोपाठ नवी मुंबईतही भुयारी मार्ग! हाय कोर्टाची प्रस्तावाला अखेर मंजूरी; पाहा कुठून-कुठे असेल हा मार्ग?

पूर्वी हा प्रकल्प सिडको आणि एमएमआरडीएने संयुक्तरीत्या पूर्ण करण्याचे नियोजित होते. मात्र आता संपूर्ण अंमलबजावणीची जबाबदारी सिडकोकडे देण्यात आली असून, हा प्रकल्प पब्लिक–प्रायव्हेट पार्टनरशीप (PPP) मॉडेलवर राबवला जाणार आहे. नवी मुंबई विमानतळ 25 डिसेंबरपासून सुरू होण्याची शक्यता असल्याने या भागातील वाढत्या वाहतुकीला हाताळण्यासाठी मेट्रो 8 महत्त्वाची भूमिका बजावणार आहे. यामुळे मुंबईहून थेट NMIA विमानतळावर पोहोचणे सोपे होणार असून, दोन्ही विमानतळांदरम्यानचा प्रवासही अधिक जलद होणार आहे.

मेट्रो लाईन 8 साठी प्रस्तावित 11 स्थानके:

वाशी, सानपाडा, जुईनगर, नेरूळ सेक्टर 1, नेरूळ, सीवूड्स, बेलापूर, सागर संगम, तारघर/मोहा, NMIA पश्चिम आणि NMIA टर्मिनल 2 (एअरपोर्ट परिसरातील दोन स्थानकांसह).

मानखुर्दहून नवी मुंबईत प्रवेश केल्यानंतर मेट्रो सायन–पनवेल महामार्गावरून वाशी, सानपाडा आणि जुईनगरमधून जाईल. नेरूळमधील एलपी जंक्शनपासून मार्ग आतल्या बाजूला वळत डॉ. डी.वाय. पाटील विद्यापीठाजवळ एक प्रमुख स्थानक असेल. त्यानंतर नेरूळ–सीवूड्समार्गे मार्ग जात वंडर्स पार्कजवळील स्थानक, अपोलो हॉस्पिटल परिसर आणि एनएमएमसी मुख्यालयाच्या मागील भागातून उलवेसेकडे वळेल. सागर संगम आणि तारघर/मोहा स्थानके वेगाने वाढणाऱ्या उलवे नोडला सेवा देतील. त्यानंतर ही मेट्रो विमानतळ कॅम्पसमध्ये प्रवेश करून NMIA पश्चिम आणि अंतिम NMIA टर्मिनल 2 येथे थांबेल.