नेमकी घटना काय?

मिळालेल्या माहितीनुसार, आरोपी हनुमंत सोनवळ याला दारूचं व्यसन आहे. तो पत्नी राजश्रीच्या चारित्र्यावर संशय घेऊन तिला मारहाण करत असे. यामुळे राजश्रीने वांद्रे कोर्टात घटस्फोटासाठी केस दाखल केली होती. सोमवारी रात्री उशिरा राजश्री एका वकिलांकडून घटस्फोटाच्या केसची माहिती घेऊन घरी आली. त्यावेळी हनुमंतने तिला कुठे गेली होतीस? असं विचारत त्रास दिला आणि पत्नी व मुलीला मारण्याची धमकी दिली. यानंतर त्यांच्यात जोरदार वाद झाला.

रात्री सव्वादोनच्या सुमारास मुलगी झोपेत असताना तिला गळ्याजवळ काहीतरी चावल्यासारखं वाटलं आणि तिला वेदना झाल्या. त्यावेळी तिला वडिलांनीच आपल्या गळ्याजवळ ब्लेडनं वार केल्याचं लक्षात आलं. त्यानंतर तिने आरडाओरड केल्यावर तिला वाचवण्यासाठी धावून आलेल्या आईच्या पोटावरही हनुमंतने ब्लेडने वार केला. या घटनेनंतर नातेवाइकांनी पोलिसांना माहिती दिली. जखमी मायलेकींना शताब्दी रुग्णालयात दाखल करण्यात आलं आहे.

दारुच्या व्यसनामुळे नेहमी भांडण

पती दारूच्या आहारी गेल्याने पत्नीसोबत रोज क्षुल्लक कारणांवरून वाद घालत असे. तसेच तो वारंवार पत्नीवर संशय घेत असे. या रोजच्या त्रासाला कंटाळून पत्नीने नुकतेच एका वकिलांना भेटून घटस्फोटाबाबत चौकशी केली होती. सोमवारी पत्नी उशिरा घरी परतल्यावर संशयिताने पुन्हा वाद घातला. पत्नीने घर विकून पुण्याला जाण्याची इच्छा व्यक्त केली होती, त्यानंतर दोघांमध्ये शाब्दिक वाद झाला आणि पती घराबाहेर पडला. सोमवारी रात्री उशिरा पत्नी आणि मुलगी झोपल्यानंतर काही तासांनी घरात परतलेल्या आरोपी बापाने झोपलेल्या मुलीवर वार केले आणि नंतर पत्नीवरही हल्ला केला. यात दोघी जखमी झाल्या असून दहिसर पोलीस ठाण्यात गुन्हा दाखल करण्यात आला असून पोलीस तपास करत आहेत.