कसा असेल मार्ग?

दोन बोगद्यांचा हा रस्ता पूर्व द्रुतगती मार्गाच्या मुखावरील ऑरेंज गेट येथे सुरू होऊन मरिन ड्राइव्ह येथे सागरी किनारा मार्गाला जोडला जाणार आहे. त्यादरम्यान तो मध्य व पश्चिम रेल्वेमार्गांसह भुयारी मेट्रो 6 च्याही 50 मीटर खालून खणला जाणार आहे. तसेच यामध्ये 3.2 मीटर रुंदीचे दुपदरी मार्ग असतील व एक मार्गिका आपत्कालीन उपयोगाची असेल. या दोन्ही बोगद्यांमधील वाहनांची कमाल वेगमर्यादा ताशी 80किमी असेल. या खोदकामासाठी बुधवारी मुख्यमंत्री फडणवीस यांच्या उपस्थितीत टीबीएम खाली सोडले जाणार आहे. हे टीबीएम 12.19 मीटर व्यास व 82 मीटर लांबीचे असून त्याचे वजन जवळपास 2400 टन इतके आहे.मुंबई मेट्रोमध्ये नवीन अपग्रेड! फुल्ली एलिव्हेटेड, 9.7 किमीची नवी मार्गिका; प्रताप सरनाईकांनी दिली संपूर्ण माहिती

प्रवासाचा वेळ 15 मिनिटांनी कमी

मंगळवारी एमएमआरडीए ने दिलेल्या माहितीनुसार, या बोगद्याचे 14 टक्के काम झाले असून, हा प्रकल्प पूर्ण होण्यासाठी 54 महिन्यांचा कालावधी लागणार आहे. मुंबईत पूर्व आणि पश्चिमला सहजपणे जोडून हा मार्ग प्रवासाचा वेळ 15-20 मिनिटांनी कमी करणार आहे. इतकी दाट लोकवसती असलेल्या भागात बनणारा हा पहिलाच भुयारी मार्ग आहे. सुरक्षेसाठी दोन्ही बोगदे दर ३०० मीटर अंतरावर क्रॉस पॅसेजद्वारे एकमेकांशी जोडले जातील.

हा बोगदा जमीनीखाली सरासरी 12 ते 52 मीटर खोल असेल. नागरिकांना श्वास घ्यायला त्रास न व्हावा यासाठी सिस्टम बसवले जातील. या बोगद्यांमध्ये आग विजवण्यासाठी आणि पुरेसा उजेड पोहचवण्यासाठी सुद्धा उपाययोजना केल्या जातील.

अचूक आणि सुरक्षित उत्खननासाठी प्रगत तंत्रज्ञानावर आधारित ‘स्लरी-शील्ड टनेल बोरिंग मशीन’ (टीबीएम) वापरली जाईल. एमएमआरडीएच्या मते, हे तंत्रज्ञान सर्वात सुरक्षित आणि आधुनिक काम करण्यास सहाय्य करेल.