नागपूरहून बेंगळुरूकडे जाणाऱ्यांची संख्या पाहता एअरलाइन्सद्वारे या मार्गावर विमानसेवा सुरू करण्याचा निर्णय घेण्यात आला आहे. नागपूर येथील डॉ. बाबासाहेब आंबेडकर आंतरराष्ट्रीय विमानतळावरून बेंगळुरूसाठी सध्या इंडिगो एअरलाइन्सची विमानसेवा आहे. इंडिगोची ही विमानसेवा दररोज असून तिला चांगला प्रतिसाद मिळत आहे. बेंगळुरू जाणाऱ्यांची तसेच तेथून नागपूरला येणाऱ्यांची संख्या बरीच आहे. प्रवाशांचे नियमित आवागमन लक्षात घेत एअर इंडिया एक्स्प्रेसने या मार्गावर विमानसेवा आजपासून सुरू करण्याचा निर्णय घेतला आहे.

नवी मुंबई विमानतळावर पहिली फूल-स्केल प्रवासी चाचणी यशस्वी; Video शेअर करत दिली मोठा अपडेट

वेळापत्रक कसे असेल?

याबाबत एअरलाइन्सद्वारे पत्रक जारी करण्यात आले आहे. त्यानुसार, बेंगळुरू येथून नागपूरसाठी दररोज सकाळी ७.२५ आणि सायंकाळी ६.३० वाजता उड्डाण भरेल. तसेच नागपूरहून दररोज सकाळी १० आणि रात्री ९.०५ वाजता बेंगळुरूसाठी उड्डाण भरणार आहे. नागपूरच्या समावेशामुळे महाराष्ट्रातील एअर इंडिया एक्स्प्रेसचा विस्तार झाला आहे. सध्या या एअरलाइन्स कंपनीद्वारे मुंबई येथून आठवड्याला १३०हून अधिक आणि पुणे येथून नव्वदहून अधिक उड्डाणांचे संचालन होत आहे.

नवी मुंबईहून लवकरच सेवा

लवकरच नवी मुंबई येथून बेंगळुरू, चेन्नई, दिल्ली, हैदराबाद आणि कोलकाता या मार्गांवर विमानसेवा सुरू होणार आहे. बेंगळुरूहून अलीकडेच अहमदाबाद, चंदीगड, देहरादून, जोधपूर आणि उदयपूर या मार्गांवर विमानसेवा सुरू करण्यात आली आहे. त्यानंतर आता नागपूरदेखील जोडल्या गेले आहे. बेंगळुरू हे एअर इंडिया एक्सप्रेसच्या जलद वाढणाऱ्या नेटवर्कमधील एक महत्त्वाचे केंद्र बनत आहे. येथून आठवड्याला ५३०हून अधिक उड्डाणांचे संचालन होते.

मिळालेल्या माहितीनुसार, बुकींग सुरू केल्याच्या तीन दिवसांतच 60 टक्के सीट्स बुक झाल्या होत्या. यामुळे विमानसेवेची किती मागणी आहे हे समजते. एअर इंडिया एक्सप्रेस 180 सीटर विमान या सेवेसाठी वापरणार असून, यामुळे व्यापारी, विद्यार्थी आणि प्रवाशांना कमी दरात नागपूर ते बंगळुरू प्रवास करता येणार आहे.