Nagpur Politics: लोकसभा, विधानसभेला मतदान करूनही या यादीतून नावे गायब झाली आहेत. ऐन निवडणुकांच्या तोंडावर हा प्रकार पुढे आल्याने राजकीय पक्षांसह नागरिकांमध्येही याबद्दल नाराजी आहे.
गेल्यावर्षी झालेल्या लोकसभा, विधानसभा निवडणुकीतही मतदारयादीत नाव नसल्याने अनेकांना मतदान करता आले नव्हते. त्यानंतर मतदारयाद्यांमधील घोळ कमी करण्यासाठी मोहीम राबवण्यात आली होती. याला फारसे यश आलेले दिसत नाही. महापालिकेच्या निवडणूक विभागाने जाहीर केल्या मूळ मतदारयादीच्या प्रारूपात अनेक चुका पुढे आल्या आहेत. प्रभाग २३चे माजी नगरसेवक नरेंद्र ऊर्फ बाल्या बोरकर यांच्या प्रभागातील सुमारे ४ हजार मतदारांना प्रभाग २६ व २७मध्ये दाखवण्यात आले आहे.
शरद पवारांच्या राष्ट्रवादीत नागपूरमध्ये भूकंप, माजी गृहमंत्री अनिल देशमुखांचे पुत्र सलील देशमुख यांचा राजीनामा
या मतदारयादीवर आक्षेप घेणारे बोरकर हे पहिले माजी नगरसेवक ठरले आहेत. बोरकर यांच्या माहितीनुसार, त्यांच्या प्रभागातील चार हजार मतदारांना दुसरीकडे हलवण्याबरोबरच पँथरनगरमधील १५०० मतदारांना प्रभाग २३मध्ये समाविष्ट करण्यात आले आहे. यापूर्वीही प्रभागरचनेदरम्यान बोरकर यांनी या मुद्द्याकडे लक्ष वेधले होते. गुरुवारी यादी प्रसिद्ध झाल्यानंतर यात अनेक चुका दिसून आल्या. माझ्या प्रभागातील सुमारे ४ हजार मतदारांना २६ आणि २७ क्रमांकाच्या प्रभागामध्ये हलवले गेले आणि पँथरनगरचे सुमारे १,५०० मतदार माझ्या भागात दाखवले गेले. मी हे प्रकरण वारंवार मांडत आहे. मात्र, कोणीही कारवाई करत नाही, असे बोरकर यांनी ‘मटा’शी बोलताना सांगितले.
बोरकर यांच्याप्रमाणेच प्रभाग ११च्या माजी नगरसेविका संगीता गिऱ्हे यांच्या माहितीनुसार, महेशनगर आणि बाबा फरीदनगर येथील मतदारांना शेजारच्या प्रभाग १०मध्ये दाखवण्यात आले आहे. प्रभागरचनेत सीमांकन बदलल्याने ही गोंधळाची स्थिती निर्माण झाली आहे. संपूर्ण यादी तपासल्यानंतर दोन दिवसांत आक्षेप नोंदवण्यात येतील, अशी माहिती त्यांनी दिली.
Nagpur Crime: लेकीच्या अफेअरचा संशय, आधी कॉलेज बंद केलं, मग जीवावर उठले, नागपुरातील घटनेचा थरारक शेवट
पुन्हा मतदानापासून वंचित ?
माजी नगरसेवकांप्रमाणेच मतदारयादीत घोळामुळे सर्वसामान्य नागरिकांमध्ये गोंधळाची स्थिती आहे. ज्या मतदारांनी २०२४च्या लोकसभा आणि विधानसभा निवडणुकीत मतदान केले, त्यांची नावे सध्या प्रसिद्ध झालेल्या यादीतून गहाळ झाली आहेत. प्रतापनगरातील रहिवासी सुरेशचंद्र कुळकर्णी यांनी दिलेल्या माहितीनुसार, त्यांच्या संपूर्ण कुटुंबाची नावे यातून वगळण्यात आली आहेत. वर्षभरापूर्वीपर्यंत वैध असलेली नावे अचानक कशी गायब होऊ शकतात, असा संतप्त सवालही त्यांनी केला आहे. याप्रमाणेच शहरातील इतर भागांमध्येही हीच स्थिती आहे. अनेक नगरांमधील नावे इतर प्रभागांमध्ये गेली आहे. तर काही ठिकाणी अनोळखी नावेही आढळून आली आहेत. ऐन निवडणुकांच्या काही दिवस आधी अशाप्रकारच्या चुका आढळून आल्याने त्या निवडणुकांपर्यंत दुरुस्त होतील का, असा प्रश्न आहे. दुरुस्ती न झाल्यास पुन्हा एकदा मतदानापासून वंचित राहावे लागेल, अशी भीतीही मतदारांना आहे
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा