ही कार उपमुख्यमंत्री एकनाथ शिंदे यांच्या नेतृत्वातील शिवसेनेच्या महिला उमेदवार किरण चौबेंची होती. त्या सभेसाठी जात असताना हा अपघात घडला असून जखमींमध्ये त्यांचाही समावेश आहे.

कसा झाला अपघात?

अंबरनाथ उड्डाणपुलावर शुक्रवारी सायंकाळी पूर्व भागातून पश्चिमेकडे शिवसेनेच्या नगर परिषद निवडणुकीच्या महिला उमेदवार किरण चौबे आपल्या कारने सभेसाठी चालल्या होत्या. यावेळी वाहन चालकाचे कारवरील नियंत्रण सुटल्याने त्याने समोरून येणाऱ्या तीन दुचाकींना जोरदार धडक दिली. यानंतर एक दुचाकीस्वार थेट उड्डाणपुलाखाली फेकला गेला. इतर वाहन चालक आणि उड्डाणपुलाखालील लोकवस्तीतील नागरिकांनी तत्काळ मदतीसाठी धाव घेतली.

कार चालकाला हृदयविकाराचा धक्का आल्यामुळे त्याचे गाडीवरील नियंत्रण सुटल्याचा प्राथमिक अंदाज पोलिसांनी वर्तवला आहे. अपघातावेळी कार चालकाचा पाय अॅक्सिलरेटर दाबलेल्या अवस्थेत अडकला होता.

शिवसेना उमेदवाराने काय सांगितलं?

पोलिसांना दिलेल्या जबाबात किरण चौबे म्हणाल्या की, गाडी पुलावरून जात असताना चालक लक्ष्मण शिंदे यांना एक फोन आला. फोनवर बोलत असतानाच अचानक त्यांनी बोलणे थांबवले. त्यावर आपण शिंदेंशी काही बोलण्यापूर्वीच, चौबेंना दिसले की चालकाचा पाय अॅक्सिलरेटरवर जोरदार दाबला गेला होता. त्यामुळे गाडी अनियंत्रित होऊन वेगाने पुढे जात राहिली आणि क्षणार्धातच अपघातही झाला.

अंबरनाथ पालिका कर्मचाऱ्यांचा मृत्यू

या अपघातात कार चालक लक्ष्मण शिंदे यांच्यासह दुचाकीवरील ४५ वर्षीय शैलेश जाधव आणि ५७ वर्षीय चंद्रकांत अनारके यांचा मृत्यू झाला. हे दोघेही जण अंबरनाथ महापालिका कर्मचारी आहेत, अशी माहिती पोलिसांनी दिली. तर १७ वर्षीय सुमीत चेलानी यालाही अपघातात प्राण गमवावे लागले.

या घटनेनंतर पोलिसांनी तत्काळ घटनास्थळी धाव घेत जखमींना रुग्णालयात उपचारासाठी दाखल केले. या अपघातामुळे उड्डाणपूल, कल्याण, बदलापूर मार्गावर मोठी वाहतूक कोंडी झाली होती. या प्रकरणी रात्री उशिरापर्यंत पोलिस अधिक तपास करत होते.