माजी नगराध्यक्ष वैभव खेडेकर काही वर्षांपूर्वी शिवसेनेत असताना रामदास कदम हे त्यांचे राजकीय गुरु होते. त्यांच्यासाठीच आता वैभव खेडेकर यांनी एक पाऊल मागे घेतले आहे. त्यामुळे अवघ्या जिल्ह्याचे लक्ष लागलेल्या खेड नगरपरिषदेत महायुतीचे आकड्यांचे गणित जुळले आहे.

खेड नगरपरिषदेत महायुतीतर्फे शिवसेनेकडून माधवी राजेश बुटाला या नगराध्यक्ष पदाच्या उमेदवार आहेत.या ठिकाणी भाजपाला तीन जागा देण्यात आल्या आहेत. माधवी बुटाला यांचा उमेदवारी अर्ज भरतानाही वैभव खेडेकर गैरहजर राहिले होते.
Prajakta Patil : उज्ज्वला थिटे अनगरला आल्या, तर मी… राजन पाटलांच्या सूनबाईंची पहिली प्रतिक्रिया, प्राजक्ता म्हणतात, गावातून त्यांना कोणी…

वैभव खेडेकरांची राजकीय पार्श्वभूमी

वैभव खेडेकर यापूर्वी खेडचे नगराध्यक्ष राहिले आहेत. मनसेच्या स्थापनेनंतर खेड ही राज्यातील पहिली नगरपरिषद त्यांनी एकहाती निवडून आणली होती. मात्र काही दिवसांपूर्वी पक्षविरोधी कारवायांचा ठपका ठेवत वैभव खेडेकर यांची मनसेतून हकालपट्टी करण्यात आली. त्यानंतर वैभव खेडेकर यांनी भाजप प्रवेशाचा निर्णय घेतला. मात्र त्यानंतरही हा प्रवेश दोनदा रद्द होऊन वेटिंगवर राहिला होता. अखेर हा प्रवेश झाला आणि वैभव खडेकर यांनी आपल्या पत्नी वैभवी खेडेकर या भाजपकडून नगराध्यक्ष पदाच्या उमेदवार असल्याचं थेट प्रोजेक्ट केलं.

दुसरीकडे शिवसेना भाजपचे नेत्यांनी जिल्ह्यात महायुती निश्चित केली. यानुसार खेड नगरपरिषदेत शिवसेनेसाठी नगराध्यक्षपद सोडण्यात आलं, तर भाजपाला तीन जागा देण्यात आल्या. महायुतीच्या उमेदवाराचा अर्ज भरल्यानंतरही वैभव खेडेकर यांनी आपल्या पत्नी वैभवी खेडेकर यांचा उमेदवारी अर्ज नगराध्यक्ष निवडणुकीसाठी भरला होता. त्यामुळे खेड तालुका परिषदेत मोठा ट्विस्ट निर्माण झाला होता.
Maharashtra Politics : शाह साहेब, ही जबाबदारी मुख्यमंत्र्यांची आहे ना… शिंदेंची नाराजी; दिल्लीत 50 मिनिटं चर्चा, भाजपश्रेष्ठी काय म्हणाले?

आता शिवसेना नेते रामदास कदम आणि गृहराज्यमंत्री योगेश कदम यांची भेट घेऊन चर्चा केली. भाजपचे प्रदेशाध्यक्ष रविंद्र चव्हाण यांच्या आदेशानंतर वैभव खेडेकर यांना एक पाऊल मागे घ्यावे लागत आहे. त्यामुळे आता वैभवी खेडेकर यांच्या नगराध्यक्ष पदाच्या निवडणुकीतील उमेदवारी अर्ज मागे घेतला जाणार आहे. खेडेकर यांच्या माघारीनंतर आता खेड नगरपरिषदेतील महायुतीची वाट सुकर झाली आहे. त्यामुळे अखेर लक्ष लागून राहिलेल्या खेड नगरपरिषदेत महायुतीचे आकड्यांचे गणित जुळलं आहे. वैभव खेडेकर यांची नाराजी आता दूर झाली असून योगेश कदम वैभव खेडेकर यांनी एकमेकांना हस्तांदोलन करत पेढा भरवून महायुती गोड केली आहे तशा स्वरूपाचे फोटो सध्या व्हायरल झाले आहेत.