राज्य सरकारने मेट्रो 8 ‘गोल्ड लाईन’ या प्रकल्पाचा प्रस्ताव मांडला आहे. ही मेट्रो मुंबईत कार्यरत असलेल्या दोन मेट्रो मार्गांना जोडली जाणार असून, पश्चिम आणि पूर्व उपनगरातील प्रवाशांना मोठा फायदा होणार आहे. यामुळे मुंबईतील कनेक्टिव्हिटीमध्ये लक्षणीय बदल होणार आहेत. ही नवीन मार्गिका मुंबई छत्रपती शिवाजी महाराज आंतरराष्ट्रीय विमानतळापासून ते नवी मुंबई आंतरराष्ट्रीय विमानतळापर्यंत थेट जोडणी देणार आहे. त्यामुळे दोन्ही विमानतळांमधील अंतर फक्त 30 मिनिटांत पार करता येणार आहे.

नवी मुंबई विमानतळावरुन उड्डाणासाठी नाताळचा मुहूर्त; ‘या’ शहरांसाठी विमानसेवा, कधीपासून होणार सुरु? पाहा वेळापत्रक

मेट्रो लाईन 8 ला एकूण 20 स्थानके असतील, जी दोन्ही विमानतळांना जोडतील. मुंबई आणि नवी मुंबई आंतरराष्ट्रीय विमानतळांदरम्यानचे अंतर कमी करणे अत्यंत गरजेचे झाले असून, ही जोडणी मुंबईतील वाढत्या उद्योग-व्यवसायालाही चालना देणार आहे. NMIA मोठ्या प्रमाणावर प्रवासी वाहतूक हाताळणार असल्याने, या दोन विमानतळांमधील सुलभ हालचाल एअरलाइन कर्मचारी, कार्गो ऑपरेटर आणि LTT किंवा इतर रेल्वे टर्मिनल्स वापरणाऱ्या प्रवाशांसाठी अत्यंत महत्त्वाची ठरणार आहे. सध्या दोन्ही विमानतळांदरम्यानचा रोड प्रवास 70 ते 90 मिनिटांचा आहे. हा वेळ आता अर्ध्या तासावर येणार आहे.

पूर्वी MMRDAसोबत नियोजित असलेला 35 किमी लांबीचा हा प्रकल्प आता राज्य सरकार CIDCOच्या भागीदारीत पूर्ण करणार आहे. CIDCOने या प्रकल्पाबाबतचा अहवाल सरकारसमोर सादर केला असून, त्यानुसार या प्रकल्पाचा खर्च 23,000 कोटी रुपये असणार आहे.

मेट्रो लाईन 8वरील प्रस्तावित 20 स्थानकांमध्ये , छत्रपती शिवाजी महाराज आंतरराष्ट्रीय विमानतळ T1, फिनिक्स मॉल, एस.जी. बर्वे मार्ग, कुर्ला, LTT, गरोडिया नगर, बैगनवाडी, मानखुर्द, वाशी, सानपाडा, जुईनगर, एलपी जंक्शन, नेरुळ 1, नेरुळ 2, सिवूड्स, अपोलो हॉस्पिटल, सागर संगम, तारघर, नवी मुंबई आंतरराष्ट्रीय विमानतळ (वेस्ट) आणि नवी मुंबई आंतरराष्ट्रीय विमानतळ T2 यांचा समावेश असेल. या मेट्रो मार्गावरील 6 स्थानके भुयारी तर 14 उन्नत असतील. या प्रकल्पाचे काम 2031 पर्यंत पूर्ण होण्याची शक्यता आहे.