व्हिडीओमध्ये नेमकं काय?
अंधेरी रेल्वे स्थानकात जिन्याखाली असलेल्या आसनांवर एक मुलगी बसलेली दिसत आहे. तिच्या समोर एक वयस्कर पुरुष काही मंत्रोच्चार करताना दिसत आहे. हा व्हिडीओ तेथील एका प्रवाशानं सोशल मीडियावर शेअर केला. अंधेरी रेल्वे स्थानकात धर्मांतर सुरु असल्याचा दावा त्यानं केला. हा व्हिडीओ सोशल मीडियावर तुफान व्हायरल झाला. त्याची दखल अंधेरी जीआरपी आणि आरपीएफनं घेतली. व्हिडीओची सत्यता शोधण्यासाठी प्रयत्न सुरु करण्यात आले आणि तपास सुरु झाला. व्हिडीओत दिसत असलेल्या दोन्ही व्यक्तींना शोधून काढण्यात आलं. काही तासांत त्यांना ताब्यात घेऊन जबाब नोंदवण्यात आले.
हॅलो, मी राहुलची बायको बोलतेय, त्याची बायको तर…; एका कॉलनं डिलिव्हरी बॉयची पोलखोल, गावभर चर्चा
अंधेरी स्थानकात वयस्कर पुरुष एका तरुणीचं धर्मांतर करत असल्याचा दावा करण्यात आला होता. व्हिडीओत दिसणारा पुरुष आणि तरुणीचा ख्रिश्चन धर्माशी संबंध नसल्याचं पोलीस तपासातून समोर आलं. दोघेही जैन हिंदू आहेत. ते एकमेकांच्या परिचयाचे आहेत. वयस्कर पुरुष रेल्वे स्थानकात तरुणीला जपानी ध्यान धारणेचं तंत्र शिकवत होता. त्यांनी दिलेल्या माहितीनुसार, हा कोणताही धार्मिक विधी नव्हता. धर्मांतराशी तर याचा दूरदूरपर्यंत कोणताही संबंध नव्हता. व्हिडीओत दिसणाऱ्या दोघांनी दिलेले जबाब पोलिसांनी नोंदवले आणि सोशल मीडियावर करण्यात आलेला दावा खोटा निघाला.

व्हिडीओ चुकीच्या अर्थानं शेअर केल्यानं, तो व्हायरल झाल्यानं आपली बदनामी झाल्याचं तरुणीनं पोलिसांना सांगितलं. व्हिडीओ चित्रित करुन चुकीचा दावा करुन खोटा माहिती पसरवणाऱ्या व्यक्ती विरोधात कठोर कारवाई करण्याची मागणी तरुणीनं पोलिसांकडे केली आहे. यासंदर्भात तिनं अंधेरी जीआरपीकडे तक्रार दाखल केली आहे. यानंतर आता व्हिडीओ चित्रित करुन तो सोशल मीडियावर शेअर करणाऱ्याचा शोध पोलीस घेत आहेत.