स्थानिक स्वराज्य संस्थांच्या निवडणुका जवळ असताना भाजपमध्ये इनकमिंग वाढले आहे. ठाणे जिल्ह्यात भाजप आक्रमकपणे माजी नगरसेवकांना पक्षात घेत असल्याने शिंदेसेनेची चिंता वाढली आहे.
ठाणे जिल्ह्यात भाजपनं आक्रमक राजकारण करत अनेक माजी नगरसेवकांना पक्षात घेतलं आहे. शिवसेनेच्या माजी नगरसेवकांच्या हाती भाजपचे प्रदेशाध्यक्ष रविंद्र चव्हाण यांनी कमळ दिलं. भाजप स्वबळ वाढवत चालल्यानं शिंदेसेनेच्या गोटात खळबळ उडाली आहे. कल्याण-डोंबिवली, अंबरनाथ, बदलापूर-कुळगावात चव्हाण यांनी पक्षप्रवेशांचा अक्षरश: धडाका लावला आहे. रविंद्र चव्हाण मुख्यमंत्री फडणवीस यांचे निकटवर्तीय मानले जातात. चव्हाण यांच्या आक्रमक रणनीतीनं शिंदेसेना जेरीस आली आहे.
फडणवीसांचा बाण वर्मी, अख्खी शिंदेसेना हलली; सगळ्यांची नाराजी एकाच शिलेदारावर, मित्रपक्ष घायाळ
एकीकडे शिंदेसेनेचे मंत्री भाजपमधील वाढत्या इन्कमिंगवर नाराजी व्यक्त करण्यासाठी मुख्यमंत्री देवेंद्र फडणवीस यांच्या भेटीला गेले होते. पण मुख्यमंत्र्यांनी शिंदेसेनेच्या मंत्र्यांचीच कानउघाडणी केली. उल्हासनगरातून सुरुवात कोणी केली? असा थेट सवाल फडणवीसांनी विचारला. तुम्ही केलं तर चालवून घ्यायचं आणि भाजपनं केलं तर तक्रार करायची, असं चालणार नाही, अशा स्पष्ट शब्दांत फडणवीस यांनी शिंदेसेनेच्या मंत्र्यांना सुनावलं.
रविंद्र चव्हाण यांच्या कार्यशैलीवर शिंदेसेनेचे मंत्री नाराजी व्यक्त करत असताना त्याचवेळी मुंबईतील भाजप कार्यालयात चव्हाण यांच्या उपस्थितीत महत्त्वाचे पक्षप्रवेश झाले. ठाकरेंच्या शिवसेनेचे नेते राजू शिंदे आणि अद्वैय हिरे यांनी भाजपमध्ये प्रवेश केला. शिंदे आणि हिरे यांच्या प्रवेशानं भाजपनं ठाकरे आणि शिंदे यांच्या शिवसेनेला एकाचवेळी धक्का दिला आहे.सुरुवात तुम्ही केली! शिंदेसेनेच्या मंत्र्यांना CM फडणवीसांनी झापलं; ‘त्या’ बैठकीत काय घडलं?
राजू शिंदे यांनी गेल्या वर्षी ठाकरेसेनेकडून विधानसभा निवडणूक लढवली. त्यांनी शिंदेसेनेच्या संजय शिरसाट यांच्या विरोधात १ लाख ६ हजार १४७ मतं घेतली. छत्रपती संभाजीनगर पश्चिम मतदारसंघात शिंदे यांचा १६ हजार ३५१ मतांनी पराभव झाला. शिंदे यांनी विधानसभा निवडणुकीआधी ठाकरेसेनेत प्रवेश केला होता. भाजपमधून ते ठाकरेंकडे गेले होते. आता त्यांची घरवापसी झाली आहे. शिंदेंचे मंत्री शिरसाट यांच्या मतदारसंघात भाजपला तगडा चेहरा मिळाला आहे.
मालेगाव बाह्य मतदारसंघातून ठाकरेसेनेकडून विधानसभा लढलेल्या अद्वैय हिरे यांनाही भाजपनं आपल्याकडे घेतलं आहे. अद्वैय हिरे यांनी तिसऱ्या क्रमांकाची मतं घेतली होती. या मतदारसंघातून शिंदेसेनेचे दादा भुसे निवडून आले. आता ते आमदार आहेत. त्यांच्याही विरोधात भाजपनं तगडा चेहरा शोधला आहे. २०२९ मध्ये भाजप स्वबळावर लढणार आहे. त्या अनुषंगानं शिंदेंच्या मंत्र्यांच्या मतदारसंघात जोरदार इन्कमिंग सुरु आहे.
लेखकाबद्दलकुणाल गवाणकर“कुणाल किशोर गवाणकर, महाराष्ट्र टाईम्समध्ये प्रिन्सिपल डिजिटल कंटेंट प्रोड्युसर पदावर कार्यरत आहेत. राज्य आणि राष्ट्रीय पातळीवरील राजकीय घडामोडींच्या बातम्या आणि त्यांचे विविध पैलू उलगडणारं लिखाण करण्यात हातखंडा. ब्रेकिंग न्यूज सोबतच राजकीय घडामोडींमधील बारकावे टिपून इनसाईड माहितीच्या आधारे सखोल विश्लेषण करणारं लिखाण करण्यात निष्णात. राष्ट्रीय आणि आंतरराष्ट्रीय पातळीवरील रंजक घटना आणि घडामोडींवर लिखाण.
तीन वर्षांपासून महाराष्ट्र टाइम्समध्ये कार्यरत. त्याआधी लोकमत ऑनलाइन, लोकसत्ता ऑनलाइनमध्ये काम. न्यूज 18 लोकमत, टीव्ही 9 वृत्तवाहिन्यांमध्ये कामाचा अनुभव. पत्रकारितेत 14 वर्षांपासून कार्यरत.”… आणखी वाचा