रविवारी धुळ्यात 8 अंश सेल्सिअस तापमानाची नोंद झाली होती. या थंडीचा आनंद घेण्यासाठी नागरिक सकाळीच घराबाहेर पडू लागले आहेत. पुढील काही दिवसांमध्ये थंडीचा कडाका अजून वाढण्याची शक्यता हवामान खात्याने वर्तवली आहे. परभणी शहरासह जिल्ह्यात मागच्या आठवडाभरापासून थंडीची लाट कायम आहे. तापमान 10 अंश खाली गेल्याने प्रचंड गारठा निर्माण झाला आहे. हवेत गारवा असल्याने दिवसभर थंडी टिकून असल्याने शाळकरी विद्यार्थी, वृद्ध आणि नागरिक उबदार कपड्यांचा वापर करत आहेत. सकाळी ग्रामीण भागातून शहरात येणारे दूध विक्रेते, भाजी विक्रेते यांना या थंडीचा मोठ्या प्रमाणात फटका बसत आहे. दुसरीकडे गहू, हरभरा यांसारख्या रबी पिकांसाठी ही थंडी पोषक आहे.

महाबळेश्वरमध्ये गेल्या काही दिवसांपासून थंडीत कमालीची वाढ झाली आहे. आठ दिवसांपासून तापमानात घसरण होऊ लागल्याने थंडीचा कडाका वाढला आहे. दिवसभर कडक ऊन आणि रात्री गारठा वाढू लागला आहे. या कडाक्याच्या थंडीसोबतच गार वारेही वाहत असल्याने पर्यटकांसह स्थानिक नागरिक थंडीत गारठले असल्याचं चित्र आहे. महाबळेश्वर शहरात किमान 10.2 अंश सेल्सिअस तापमानाची नोंद होत असून, वेण्णा लेक परिसरात त्याहून कमी तापमानाची नोंद होत आहे. थंडीत वाढ झाल्याने सकाळी वेण्णा लेकवर पर्यटक फिरकत आहेत. कडाक्याची थंडीने महाबळेश्वरमध्ये निसर्गाची विविध आकर्षक रूपे आणि सृष्टीसौंदर्य पाहायला मिळत आहेत. महाबळेश्वर सोडून काही किलोमीटर अंतरावर बोचरी थंडी आणि महाबळेश्वरमध्ये असलेली गुलाबी थंडी यातील फरक पर्यटक अनुभवत आहेत. पर्यटकांसह स्थानिकही थंडीपासून बचाव होण्यासाठी स्वेटर, कानटोपी, जॅकेट्सचा आधार घेत आहेत.

पुणे-मुंबईत काय स्थिती?

राजधानी मुंबईसह पुण्यातही तापमानात घट झाली असून थंडी वाढली आहे. मुंबईकरांनीही कधी नव्हे ते स्वेटर बाहेर काढले आहेत. पुण्यासह अनेक जिल्ह्यांमध्ये थंडीच्या लाटेचा अलर्ट देण्यात आला आहे. पुढील दोन दिवस राज्यभरात अशीच परिस्थिती राहण्याचा अंदाज व्यक्त केला जात आहे. त्यामुळे नागरिकांना अधिक काळजी घेण्याची गरज आहे.

नागपूरकरही गारठले

नागपुरात रविवारी जागोजागी शेकोट्या पेटलेल्या दिसल्या, अन् थंडी वाढल्याला ‘अधिकृत मान्यता’ मिळाली. गेल्या काही दिवसांपासून अनुभवास येणाऱ्या थंडीचा कडाका आता आणखी वाढला असून, नागपुरात तापमानाचा पारा 10.8 अंशांपर्यंत खाली घसरला आहे. सध्या आलेली ही थंडीची लाट येत्या काळातही कायम राहणार असून पुढील संपूर्ण आठवड्यात नागपुरातील किमान तापमान 11 ते 13 अंश सेल्सियसदरम्यान राहणार असल्याचा अंदाज हवामान खात्याने वर्तवला आहे. यंदाच्या हिवाळ्याला गेल्या दोन ते तीन दिवसांपासून दमदार सुरुवात झाल्याचे जाणवत आहे. तापमानात एकदम घसरण झाली आहे. मागील आठ दिवसांपासून वाढलेल्या या थंडीची हुडहुडी शहरवासीयांमध्ये भरली आहे. सकाळी आणि रात्रीशिवाय आता सायंकाळीही चांगलीच थंडी जाणवू लागली असून सायंकाळपासूनच ठिकठिकाणी शेकोट्या पेटलेल्या दिसत आहेत.