उमंग व्हाईट गोल्ड प्रायव्हेट लिमिटेड या कंपनीच्या नावाने घेतलेले औद्योगिक कर्ज न भरल्याने ते एनपीए झाले होते. बँकेकडून संधी देऊनही परतफेड न केल्याने बँकेने कार्यवाही सुरू केली. मात्र, या दरम्यान बँकेकडे गहाण ठेवलेली मशिनरी कंपनीच्या संचालकांनी संगनमताने विकल्याचा आरोप करण्यात आला आहे. त्यानुसार बँकेच्या चाळीसगाव शाखेचे व्यवस्थापक जीवन राजूरकर यांनी दिलेल्या फिर्यादीवरून उन्मेष पाटील, संजय धनकवडे, प्रशांत वाघ आणि प्रमोद जाधव यांच्या विरोधात फसवणुकीसह विविध कलमान्वये चाळीसगाव ग्रामीण पोलिसात गुन्हा नोंदवण्यात आला आहे.

Ahilyanagar News: दोस्तीत कुस्ती! मित्रानेच मित्राला मारहाण केली, त्याची दुचाकीही जाळून टाकली; कारण ऐकून हादरुन जाल

दरम्यान, मंत्री गिरीश महाजन आणि उन्मेष पाटील यांच्यात अलीकडेच भूखंड प्रकरणावरून आरोप-प्रत्यारोप रंगले होते. त्यावेळी मंत्री गिरीश महाजन यांनी उन्मेष पाटील यांच्यावर त्यांनी स्टेट बँकेसह अन्य एका बँकेला गंडवल्याचा गंभीर आरोप केला होता. या आरोपाच्या अवघ्या तीन दिवसांनंतरच हा गुन्हा दाखल झाला आहे. या कारवाईची राजकीय वर्तुळात चांगलीच चर्चा रंगली आहे. नगरपालिका निवडणुकीच्या पार्श्वभूमीवर ठाकरे गटासाठी ही मोठी अडचण मानली जात आहे.

दरम्यान, राज्यात पार्थ पवार, मुरलीधर मोहोळ यांच्या जमिनीचे व्यवहारही वादात अडकल्यानंतर राज्यात मोठा वाद उभा राहिलेला होता. राज्यातले सत्ताधारी मोठमोठे भूखंड कवडीमोल भावात हडपत असल्याचा त्यांच्यावर विरोधकांनी आरोप केला होता. त्यानंतर आता उन्मेष पाटलांवर फसवणुकीचा गुन्हा दाखल झाल्यानंतर विरोधी पक्षातले नेतेही कारवाईच्या फेऱ्यात अडकले आहेत असं म्हणावं लागेल.