नाशिक पोलिसांनी शोएब मुराद खान (वय ३९, रा. वडाळा), शेख मुस्तफा अफजल (१९, रा. खोडेनगर), मोफिज मुज्जमिल खान (१९, रा. वडाळा चौक) या संशयितांना अटक केली आहे. तिघांकडून १ लाख ६० हजारांचे ३२ ग्रॅम एमडी आणि इतर मुद्देमाल जप्त करण्यात आला. दरम्यान, नाशिक-पुणे रस्त्यावरील हॉटेल नाशिक इन येथे ‘एमडी’ तस्कर लपल्याची गोपनीय माहिती पोलिस आयुक्तालयास प्राप्त झाली. गुन्हे विभागाचे सहाय्यक पोलिस आयुक्त संदीप मिटके यांच्यासह अमली पदार्थ विरोधी पथक, नाशिकरोड आणि उपनगर पोलिस ठाण्याच्या पथकांनी संयुक्तरित्या हॉटेलात धाड टाकली. त्यावेळी खोली क्रमांक ३०५ मध्ये तिघे संशयित ‘एमडी’ बाळगताना आढळून आले.
रेशनकार्डधारकांना मोठा दिलासा! ‘या’ लाभार्थींना मिळणार घरपोच धान्य, पुरवठा विभागाचा निर्णय
त्यांच्याकडून कसून चौकशी केली असता शोएबचे वडील ग्रामीण पोलिस दलातून सेवानिवृत्त झाल्याचे पथकाला समजले. तर, उर्वरित दोघांपैकी एकजण टपरीचालक असून, दुसरा कारच्या शोरूममध्ये कार्यरत होता. सध्या तिघेही बेरोजगार असून, नशेच्या आहारी गेल्याने त्यांनी ठाणे जिल्ह्यातील डोंगरी येथून ‘एमडी’ खरेदी करून स्वतःच्या नशेसह विक्रीसाठी आणल्याची कबुली दिली. तिघांनाही ताब्यात घेऊन उपनगर पोलिसांच्या ताब्यात देत गुन्हा नोंदविण्यात आला आहे.
व्यापाऱ्यांकडून FDAची राजरोस वसुली! मंत्र्यांच्या जिल्ह्यातच सरकारी बाबूंकडून ‘खंडणी’, प्रकरण काय?
हॉटेलमालकावरही गुन्हा
ड्रग्ज तस्करांना हॉटेलात जागा उपलब्ध करून दिल्याने हॉटेलमालक संशयित कपिल देशमुख यालाही सहसंशयित करण्यात आले आहे. त्याचाही गुन्ह्यात सहभाग निष्पन्न झाल्याचा ठपका ठेवत त्याच्याविरूद्धही गुन्हा नोंदविण्यात आला आहे. यापूर्वीदेखील द्वारका परिसरातील एका हॉटेलात महिलेसह सराईत गुन्हेगाराला एमडी तस्करीच्या गुन्ह्यात अटक झाली होती. शहरातील बऱ्याच हॉटेलांमध्ये अवैधरित्या नशेखोरी होत असल्याचे त्यातून उघड होत असून, हॉटेलांची धडक तपासणी मोहीम राबविण्याची अपेक्षा नागरिकांनी व्यक्त केली आहे