मुंब्रा दुर्घटना अपघात प्रकरणी दोन अभियंत्यावर कारवाई केल्याच्या निषेधार्थ आज रेल्वे कर्मचाऱ्यांच्या संघटनांनी छत्रपती शिवाजी महाराज टर्मिनस येथे आंदोलन केलं. कर्मचाऱ्यांनी आज संध्याकाळी सीएसएमटी स्थानकावर बसून घोषणाबाजी करत आंदोलन केलं. हे आंदोलन आज संध्याकाळी 5.40 च्या सुमारास सुरु झालं होत. ते 6.40 पर्यंत सुरु होतं. या आंदोलन काळात मध्य आणि हार्बर रेल्वेची वाहतूक ठप्प झाली होती. पण वरिष्ठांनी मध्यस्थी केल्यानंतर हे आंदोलन स्थगित झालं. यानंतर हळहळू एक-एक लोकल ट्रेन सुरु झाली. पण यानंतर मोठी दुर्घटना घडल्याची माहिती आहे. सँन्डहर्स्ट रोड रेल्वे स्थानकावर मोठी दुर्घटना घडली आहे. तीन ते चार जणांचा अपघात झाल्याची माहिती मिळत आहे.

मिळालेल्या माहितीनुसार, सँन्डहर्स्ट रोड स्थानक परिसरात तीन प्रवासी रुळांवर चालत होते. या दरम्यान रेल्वे धडकेत काही प्रवाशांचा अपघात झाला. सुरुवातीला यात तीन प्रवाशांचा मृत्यू झाल्याची प्राथमिक माहिती समोर आली होती. यानंतर आता तिघांचा मृत्यू झाल्याची माहिती आहे.

Mumbai Local : रेल्वे कर्मचाऱ्यांनी मुंबईची लोकल थांबवली, मध्य रेल्वेची वाहतूक 50 मिनिटं थांबली, अखेर…

मध्य रेल्वेच्या अनेक स्थानकांवर प्रचंड गर्दी

रेल्वे कर्मचाऱ्यांच्या आंदोलनामुळे मध्य रेल्वे आणि हार्बर रेल्वेची वाहतूक विस्कळीत झाली होती. जवळपास एक तास मध्य रेल्वेची वाहतूक ठप्प झाली होती. त्यामुळे सीएसएमटी, दादर, ठाणे, कुर्ला, घाटकोपर अशा विविध रेल्वे स्थानकांवर प्रवाशांची प्रचंड मोठी गर्दी निर्माण झाली आहे. एक तास गाड्या उशिराने असल्याने प्रवासी मिळेल त्या लोकलने घरी जाणं पसंत करत आहेत. पण यामुळे ट्रेनमध्ये खचाखच गर्दी भरली जात आहे. तसेच रेल्वे स्थानकांवर देखील मोठी गर्दी जमा होत आहे. यामुळे प्रवाशांच्या जीवितास धोका निर्माण झाला आहे. दरम्यान, आजच्या घटनेत तीन जणांच्या मृत्यूला सरकार कुणाला कारणीभूत ठरवणार? ते पाहणं आता महत्त्वाचं आहे.