शार्प शूटर सुनील बनसोडे ताब्यात

गेल्या अनेक दिवसांपासून पोलिसांच्या हातावर तुरी देऊन पसार असलेला आणि ज्याच्यावर मकोकासह इतरही गंभीर गुन्हे दाखल आहेत, तो गजा मारणे टोळीतला गुंड सुनील बनसोडेला काल पुणे पोलिसांनी ताब्यात घेतलं आहे. मध्यरात्री ही कारवाई पोलिसांनी केली आहे. यावेळी सुनील बनसोडे हा वारजे माळवाडी परिसरात असल्याची माहिती पोलिसांना मिळाल्यानंतर त्यांनी तातडीने ही कारवाई करत सुनीलच्या मुसक्या आवळल्या आहेत. ज्यादा नफ्याचं आमिष, शेअर मार्केटच्या नावाअडून थेट मनी लाँन्ड्रिंग; कोट्यवधींचा खेळ अन् नगरचा प्राध्यापक फसला…

शार्प शूटर अशी ओळख

दरम्यान, सुनील बनसोडे हा गजा मारणे टोळीचा प्रसिद्ध शार्प शूटर आहे. पुण्यात गेल्या काही दिवसांत झालेल्या प्रकणांमध्ये सुनीलचा काही हात आहे का अशाही अंगाने तपास पोलिस करत आहेत. काल रात्री गोपनीय माहितीच्या आधारे वारजे माळवाडी परिसरात छापा टाकत त्याच्यावर कारवाई केली आहे. सुनीलला ताब्यात घेणे हे पोलिसांसमोरचं मोठं आव्हान होतं. अनेक गंभीर गुन्हे दाखल असलेल्या गुंडाला ताब्यात घेणे हे पुणे पोलिसांसाठी एक मोठं यश मानलं जात आहे. पुण्यामध्ये सुनील बनसोडेचा काही मोठा प्लॅन होता का, अशा अँगलनेही पोलिस आता चौकशी करतील, अशी अपेक्षा व्यक्त केली जात आहे.

केंद्रीय मंत्री मुरलीधर मोहोळ यांच्या कार्यकर्त्याला मारहाण केल्याप्रकरणी गजा मारणेला अटक करण्यात आलेली आहे. ही घटना शिवजयंतीच्या दिवशी पुण्यातल्या कोथरुडमध्ये घडली होती. कुख्यात गुंड गजा मारणेला सांगलीतील जिल्हा कारागृहात रवाना करण्यात आलेलं आहे. दरम्यान, पुण्यात आंदेकर टोळी, माया टोळीही सक्रिय आहे. त्यामुळे पुण्यातील टोळीयुद्ध आणखी पेटल्याचा अंदाज व्यक्त केला जात आहे.