निवेदनामध्ये एकनाथ शिंदे यांच्या नेतृत्वाखालील शिवसेना कायदा सेलकडून विविध मागण्या करण्यात आल्या आहेत. यामध्ये दुबार नावे, जिल्ह्यातील अन्य भागातील नावे विशिष्ट विधानसभा मतदारसंघात टाकणे, मृत तसेच स्थलांतरित व्यक्तींची नावे दोन ठिकाणी असणे, असे अनेक आक्षेप घेण्यात आले आहेत. त्यावर सुधारणा करण्याच्या दृष्टिकोनामधून उपाय सुचवण्यात आले असून देशासह राज्यातील लोकसभा व विधानसभा मतदारसंघात दुबार नावे वगळावीत. सध्या अनेक मतदारसंघांमध्ये एकाच व्यक्तीची नावे दोन किंवा अधिक वेळा नोंदवली गेल्यामुळे दुबार नावांची त्वरित तपासणी आणि पंचनामे करून ती वगळण्यात यावीत. एका मतदाराचे नाव एकाच मतदारसंघातच असावे याची खात्री करण्यात यावी, असं म्हणण्याता आलं आहे.

दरम्यान, “आधुनिक तंत्रज्ञानाचा वापर करून दुबार नावांची छाननी केली जावी. अनेक कुटुंबातील व्यक्तींची नावे वेगवेगळ्या मतदान केंद्रांत किंवा विभागांत चुकीच्या पद्धतीने नोंदवण्यात आली आहेत. कुटुंब एकत्रीकरण मतदार करण्याची प्रणाली राबवली जावी. एकाच ठिकाणी वास्तव्य असलेल्या संपूर्ण कुटुंबातील व्यक्तींची नावे एकाच मतदारयादीत देण्यात यावीत. त्यासाठी ऑनलाइन अर्ज आणि सुधारणा केंद्र सुरू करावीत. मृत व्यक्तींची नावे वगळावी, यासाठी नागरी नोंदणी कार्यालय आणि मतदारयाद्यांचा डेटा जोडून मृत व्यक्तींची नावं स्वयंचलित वगळावी. मतदार नावे योग्य मतदान केंद्रातच असावीत, आयोगाने याद्यांचे पुनरावलोकन करून अशा त्रुटी दूर कराव्या. मतदार नोंदणी करताना आधार, पॅन आणि जन्म दाखला यांसारख्या अधिकृत दस्तऐवजांचा आधार घ्यावा. मतदार ओळखपत्रावरील फोटो स्पष्ट असायला हवेत. मतदारासाठी बायोमॅट्रिक कार्ड असावे आणि आधारशी जोडणे अनिर्वाय करावे. मतदाराचे बायोमॅट्रिक आधारित ओळखपत्र करावं,” अशा मागण्याही करण्यात आल्या आहेत.