मुलांना ओलीस ठेवणारा व्यक्ती मानसिक रुग्ण असल्याची माहिती समोर आली आहे. गेल्या चार ते पाच दिवसांपासून तो मुलांच्या ऑडिशन घेत होता. आज त्यानं १०० मुलांना ऑडिशनला बोलावलं होतं. त्यातून ८० जणांना त्यानं परत पाठवलं. मात्र बाकीच्या मुलांना एका खोलीत डांबून ठेवलं. मुलं खिडक्यांमधून बाहेर वाकून पाहत होती. त्यांच्या चेहऱ्यांवर भीती स्पष्ट दिसत होती. त्यानंतर परिसरात खळबळ उडाली. आसपास राहणारे लोक मोठ्या संख्येनं स्टुडिओच्या परिसरात जमले.

रोहित आर्य असं मुलांना स्टुडिओत डांबून ठेवणाऱ्या तरुणाचं नाव आहे. त्याचा एक व्हिडीओदेखील समोर आला आहे. त्यानं आग लावून देण्याची धमकी दिली. रोहितनं डांबून ठेवलेली मुलं १५ ते २० वर्षे वयोगटातील असल्याची माहिती पुढे आली आहे. रोहितनं ओलीस ठेवलेली मुलं काकळुतीला आली. ती खिडकीतून बाहेर होती. भेदरलेल्या मुलांना पाहून स्टुडिओच्या खाली गर्दी जमली. घटनेची माहिती पोलिसांना देण्यात आली.

घटनेची माहिती मिळताच पोलीस पोहोचले. त्यांनी स्टुडिओला चारही बाजूंना घेरलं. आसपासच्या भागात हाय अलर्ट जारी करण्यात आला. पोलिसांनी आरोपीची ओळख पटवली. त्याचा हेतू आणि मागण्या समजून घेण्याचा प्रयत्न केला. यानंतर रोहितला पकडण्यात आलं. मुलांची सुखरुप सुटका करण्यात आली. ओलीस ठेवण्यात आलेल्या मुलांची सुटका झाल्यानं सगळ्यांचाच जीव भांड्यात पडला. काही काळ परिसरात तणावपूर्ण परिस्थिती होती. पोलिसांनी रोहित आर्यला अटक केली असून त्याची चौकशी सुरु करण्यात आली आहे.