मुंबईत नीट पेपर फुटी प्रकरणाच्या निषेधार्थ झालेल्या विद्यार्थी आंदोलनात ऊर्वशी सहभागी झाली होती. शांततेत पार पडलेल्या या आंदोलनात ऊर्वशीनं एक रील चित्रित केलं होतं. तो व्हिडीओ शेअर करत भाजपनं ‘बाबरच्या वारशावर नाचणारे जेन झी,’ असा उल्लेख केला. राष्ट्रपतींच्या हस्ते शौर्य पुरस्कार करणाऱ्या मुलाचा आणि ऊर्वशीचा आंदोलनात नाचतानाचा व्हिडीओ शेअर करत छत्तीसगड भाजपनं त्यांची तुलना केली. तुम्ही कोणत्या जेन झीची निवड करणार, असा प्रश्न भाजपकडून विचारण्यात आला. भाजपच्या पोस्टला ऊर्वशीनं पीपीटीच्या माध्यमातून प्रत्युत्तर दिलं आहे.

माझ्या परवानगीशिवाय माझा व्हिडीओ वापरण्यात आला असून त्यावर कॅप्शन लिहिण्यात आलं आहे. तेव्हापासून मला अनेकांचे मेसेज येत आहेत. तू ठीक आहेस ना, अशी विचारणा होत आहे, असं ऊर्वशीनं व्हिडीओच्या सुरुवातीला म्हटलं आहे. ‘मी तीच जेन झी विद्यार्थिनी आहे, जिच्या सोबत हे घडलं. मी या गोष्टीला गांभीर्यानं घेत नाही. त्यामुळे या व्हिडीओतून प्रतिक्रिया देत आहे,’ असं ऊर्वशीनं हसत हसत म्हटलं.

भाजपनं शेअर केलेल्या व्हिडीओची ऊर्वशीनं पद्धतशीरपणे खिल्ली उडवली आहे. ‘सर्वप्रथम, तुमचा कॅप्शन गेम खूपच कमजोर आहे. बाबरचा वारसा यासारख्या गोष्टींमुळे आजची तरुणाई जोडली जात नाही. त्यामुळे तरुणाईला जोडणारं कॅप्शन द्या,’ असा सल्ला ऊर्वशीनं छत्तीसगड भाजपला दिला आहे.
Farmer Protest: आंदोलनात प्रचंड गर्दी, चालक नसलेली बस पुढे सरकू लागली; महिला एसीपींच्या धाडसानं मोठा अनर्थ टळला
२०२६ मध्येही फोडा आणि राज्य करा, असा प्रश्न करत ऊर्वशीनं भाजपचा समाचार घेतला. ‘जेन झीच्या एकजुटीमुळेच संसदेपर्यंत नवे शब्द पोहोचले. त्यांच्याच फूट टाकण्याचा प्रयत्न कशासाठी?’, असा सवाल ऊर्वशीनं केला आहे. यासोबतच तिनं तिच्या शैक्षणिक कारकि‍र्दीची माहिती देताना घरातील पदकं दाखवली आहेत. ‘मला दहावी आणि बारावीला ९३ टक्के होते. मी अभ्यासासोबत डान्स आणि कंटेट क्रीएशन दोन्ही केलं. माझ्या घरात केवळ डान्ससाठी मिळालेली बक्षिसं नाहीत, तर अभ्यास, योग, कराटे यासाठी मिळालेली बक्षिसंदेखील आहेत. अभ्यास आणि अभ्यासेतर गोष्टी एकाचवेळी करता येऊ शकतात,’ असंही ऊर्वशीनं म्हटलं आहे.