या प्रकरणी टिंगरेनगर येथे राहणाऱ्या ८० वर्षीय महिलेने सायबर पोलिस ठाण्यात तक्रार दिली आहे. त्यानुसार, सायबर चोरट्यांविरोधात फसवणूक, तोतयेगिरी, सरकारी अधिकारी असल्याची बतावणी करून फसवणूक या भारतीय न्याय संहितेच्या कलमांसह माहिती-तंत्रज्ञान कायद्यानुसार गुन्हा दाखल करण्यात आला. हा ऑनलाइन फसवणुकीचा प्रकार १६ ऑगस्ट ते १७ सप्टेंबर दरम्यान घडला.

तक्रारदार टिंगरेनगर येथील एका सोसायटीत राहतात. त्यांच्या तीन मुली अमेरिकेत असतात. तक्रारदारांच्या पतीला १६ ऑगस्ट रोजी सायबर चोरट्यांनी फोन करून कुलाबा पोलिस ठाण्यातून आयपीएस अधिकारी बोलत असल्याची बतावणी केली. विमान कंपनीशी निगडित मोठ्या आर्थिक गैरव्यवहार आणि अनैतिक मानवी तस्करीसाठी तक्रारदारांच्या पतीच्या बँक खात्याचा वापर झाल्याचा बनाव रचून चोरट्यांनी तक्रारदारांच्या मोबाइलवर गुन्ह्याची नोटीस पाठवली. त्यामुळे हवालदिल झालेल्या तक्रारदारांच्या पतीने हा सर्व प्रकार खोटा असल्याचे सांगितले. त्यावर, सायबर चोरट्यांनी सीबीआयचे अधिकारी आणि उच्चपदस्थ पोलिस अधिकाऱ्यांच्या नावाने बोलत असल्याचे सांगून या प्रकाराची शहानिशा करण्यासाठी तुम्हाला प्रत्यक्ष अटक ‘डिजिटली’ अटक करण्याचे पर्याय दिले. या प्रकारामुळे तक्रारदार व त्यांचे पती घाबरून गेले. त्यानंतर चोरट्यांनी या दाम्पत्याला व्हॉट्सॲप ग्रुपमध्ये समाविष्ट करून व्हिडिओ कॉल करून तीन दिवस कॅमेऱ्यासमोर बसवून ठेवले; तसेच पडताळणीच्या नावाखाली त्यांच्या बँक खात्यातून वेळोवेळी एक कोटी १९ लाख रुपये बँक खात्यांवर पाठविण्यास सांगितले.
Pune Crime : पुण्यातील नकुल भोईर हत्या प्रकरणाला धक्कादायक वळण; पत्नीनं बॉयफ्रेंडच्या मदतीनं पतीचा काढला काटा, अन् नंतर…
अखेर हा फसवणुकीचा प्रकार असल्याचा संशय आल्यावर या दाम्पत्याने पुणे सायबर पोलिस आणि केंद्र सरकारच्या सायबर हेल्पलाइनवर तक्रार दिली. पुणे सायबर पोलिसांनी या तक्रारीची गंभीर दखल घेऊन तपास सुरू केला. दरम्यान, तक्रारदारांच्या पतीचे २३ ऑक्टोबर रोजी निधन झाले, असे तक्रारीत नमूद आहे. सायबर पोलिस ठाण्याच्या वरिष्ठ निरीक्षक स्वप्नाली शिंदे तपास करीत आहेत.

अशी घ्या काळजी
-कोणतेही राज्य किंवा केंद्रीय तपास संस्था कधीही कोणाला कॉल करून कारवाई न करण्याकरिता पैशांची मागणी करीत नाहीत.
-सायबर गुन्हेगार व्हॉट्सअॅप / स्काइपसारख्या माध्यमांचा वापर करून असे व्हिडिओ कॉल करून कारवाईची भीती दाखवितात.
-अशा कोणत्याही कॉलला नागरिकांनी प्रतिसाद देऊ नये; तसेच कोणताही बैंक तपशील, आधार कार्ड, पॅन कार्ड, छायाचित्रे, पत्ता, डेबिट किंवा क्रेडिट कार्डाचे तपशील सायबर गुन्हेगारांना पाठवू नये.

सायबर फसवणूक झाल्यास येथे करा संपर्क
१९३० (राष्ट्रीय हेल्पलाइन क्रमांक)
शिवाजीनगर येथील सायबर पोलिस ठाणे
जवळच्या पोलिस ठाण्यातील सायबर कक्ष

डिजिटल अरेस्ट म्हणजे काय ?
सायबर चोरटे पोलिस अधिकारी असल्याचे भासवून नागरिकांना गुन्हेगारी कृत्य केल्याची भीती दाखवून ऑनलाइन चौकशी करण्याची धमकी देतात. त्यानंतर व्हॉट्सअॅप/स्काइपद्वारे व्हिडिओ कॉल करून कॅमेऱ्यासमोर बसवून ठेवून पडताळणीच्या नावाखाली बँक खात्यातून पैसे पाठविण्यास सांगतात
निलेश घायवळ टोळीचा नवा धक्कादायक कारनामा; फसवणुकीसाठी वापरले निर्दोष शेतकऱ्याचे कागदपत्रे
पुण्यातील ‘डिजिटल अटके’च्या गुन्ह्यांच्या नोंदी
२०२४
पुणे सायबर पोलिस ठाणे २५
इतर सर्व पोलिस ठाणी १४६
२०२५
पुणे सायबर पोलिस ठाणे १७
इतर सर्व पोलिस ठाणी ३९
(सायबर फसवणुकीची रक्कम २५ लाखांपेक्षा अधिक असल्यास गुन्ह्याची नोंद सायबर पोलिस ठाण्यात होते.)
बिबट्या आला रे…, AI यंत्रणा देणार मोबाइलवर नोटिफिकेशन, गाव-वस्त्यांना जागृत करण्यात अलर्ट ठरतोय प्रभावी
पोलिस किंवा तपास यंत्रणांकडून कधीही कॉल करून ‘डिजिटल अरेस्ट’ची भीती घातली जात नाही. किंबहुना कायद्यामध्ये ‘डिजिटल अरेस्ट’ असा कोणताही प्रकार नाही. त्यामुळे नागरिकांनी अशा कोणत्याही कॉलला घाबरून सायबर गुन्हेगारांच्या धमकीला बळी पडू नये. असे प्रकार घडल्यास तातडीने जवळच्या पोलिस ठाण्यात किंवा सायबर पोलिस ठाण्यात तक्रार नोंदवा. – स्वप्नाली शिंदे, वरिष्ठ पोलिस निरीक्षक, सायबर पोलिस ठाणे