कार्यक्रमादरम्यान राष्ट्रवादी काँग्रेसच्या महिला पदाधिकारी आणि प्रसिद्ध नृत्यांगना शिल्पा शाहीर यांनी लावणीचे सादरीकरण करून उपस्थितांची मने जिंकली. त्यांच्या सादरीकरणाला कार्यकर्त्यांकडून उत्स्फूर्त प्रतिसाद मिळाला. काही तरुण कार्यकर्त्यांनी “वन्स मोर”च्या घोषणा देत पुन्हा सादरीकरणाची मागणी केली, ज्यावर शिल्पा शाहीर यांनी पुन्हा एकदा रंगतदार सादरीकरण केले. या प्रसंगाचा व्हिडिओ काही कार्यकर्त्यांनी मोबाईलवर टिपला आणि काही तासांतच तो सोशल मीडियावर व्हायरल झाला. व्हिडिओ व्हायरल झाल्यानंतर विविध राजकीय वर्तुळामध्ये या घटनेवर चर्चा सुरू झाली. काही जणांनी या कार्यक्रमातील सादरीकरणावर टीका केली, तर काहींनी याला केवळ सांस्कृतिक आणि कौटुंबिक कार्यक्रमाचा भाग असल्याचे म्हटले.
Solapur News: द्राक्षबाग उद्ध्वस्त झालेल्या ‘त्या’ शेतकरी महिलेला आमदारपुत्राची भेट, शेतकरी महिलेचा पुन्हा टाहो
या संदर्भात राष्ट्रवादी काँग्रेस पक्ष (अजित पवार गट) चे नागपूर शहराध्यक्ष अनिल अहिरकर यांनी स्पष्ट केले की, “लावणी सादर करणाऱ्या शिल्पा शाहीर या आमच्या पक्षाच्या कार्यकर्त्या आणि महिला पदाधिकारी आहेत. कोणत्याही बाहेरील कलाकारांना आमंत्रित केले नव्हते. दिवाळी स्नेहमिलनाच्या निमित्ताने कार्यकर्त्यांनी आपापली कला सादर केली.” त्यांनी पुढे सांगितले की, “या व्हिडिओबाबत खासदार सुनेत्रा पवार यांनी मला फोन करून विचारणा केली. आम्ही त्यांना सर्व परिस्थिती स्पष्ट केली आहे.”

दरम्यान, शहर महिला अध्यक्षा सुनीता येरणे यांनीही प्रतिक्रिया देताना म्हटले, “हा कार्यक्रम पूर्णतः कौटुंबिक आणि स्नेहपूर्ण वातावरणात पार पडला. लावणी सादर करणारी महिला आमचीच पदाधिकारी असून, तिने केवळ मनोरंजनाच्या हेतूने सादरीकरण केले. या व्हिडिओचा चुकीचा अर्थ काढू नये.” असे आव्हान केले आहे.

या घटनेनंतर सोशल मीडियावर व्हिडिओ मोठ्या प्रमाणात शेअर होत असून, नागरिक आणि कार्यकर्त्यांमध्ये यावर जोरदार चर्चा सुरू आहे. काहींनी याला सांस्कृतिक सादरीकरण मानले आहे, तर काहींनी राजकीय कार्यालयातील अशा कार्यक्रमांवर प्रश्नचिन्ह उपस्थित केले आहे.