पोलिसांनी बाळाला ताब्यात घेऊन वैद्यकीय तपासणीनंतर ते सुखरूपपणे आईच्या ताब्यात दिलं. तीन दिवसांनंतर आपले बाळ पुन्हा सुखरूप आईच्या कुशीत विसावलं. कुटुंबाने यावेळी भावनाविवश होऊन पोलिसांचे आभार मानले. या कारवाईत स्थानिक गुन्हे अन्वेषणचे अधिकारी आणि विश्रामबाग पोलीस ठाण्याच्या पथकांनी महत्त्वाची भूमिका बजावली. अटक केलेल्या इनायतला विश्रामबाग पोलिसांच्या ताब्यात दिलं असून, रेकॉर्डवरील गुन्हेगार असलेले त्याचे साथीदार इम्तियाज पठाण आणि वसीमा पठाण या दोघांचा शोध पोलीस घेत आहेत.
अत्यंत गरीब परिस्थिती असलेल्या राजस्थानमधील कोटा येथील विक्रम पुष्पचंद बागरी हे त्यांची पत्नी, एक वर्षाचा मुलगा आणि मुलगी यांच्यासह सांगलीतील विश्रामबाग चौकात रस्त्याच्या कडेला राहून फुगे विक्रीचा व्यवसाय करतात. 20 ऑक्टोबर रोजी मध्यरात्रीनंतर एकच्या सुमारास, दिवाळीच्या लक्ष्मीपूजनाच्या रात्री, त्यांचा एक वर्षाचा मुलगा आईजवळ झोपलेला असताना, तीन चोरट्यांच्या टोळीने त्याला पळवून नेलं.
पहाटेच्या सुमारास बाळ जवळ नसल्याचं कळताच आईने टाहो फोडला. तिने हाकेच्या अंतरावर असलेल्या विश्रामबाग पोलीस ठाण्यात धाव घेत ‘माझे बाळ मला द्या’ अशी विनवणी केली. पोलीस निरीक्षक सुधीर भालेराव यांनी तातडीने बाळाला सुखरूप आणून देण्याची ग्वाही दिली. पोलीस अधीक्षक संदीप घुगे यांना घटनेची माहिती मिळताच त्यांनी स्थानिक गुन्हे अन्वेषणच्या पथकाला तातडीने शोध घेण्याचे निर्देश दिले.
वेळेआधी जन्म, हालचालही करेना; डॉक्टरांनी मृत जाहीर केलेलं बाळ घरी शवपेटी उघडताच जिवंत!
स्थानिक गुन्हे अन्वेषणचे निरीक्षक पंकज पवार यांच्या नेतृत्वाखालील पथकाने विश्रामबाग पोलिसांसह तांत्रिक माहिती आणि गोपनीय बातमीदारांमार्फत समांतर तपास सुरू केला. तपासादरम्यान संशयित इनायत अब्दुलसत्तार गोलंदाज (वय 43, रा. किल्ला भाग, मिरज), इम्तियाज पठाण आणि वसीमा इम्तियाज पठाण यांनी मुलाला चोरल्याची माहिती पोलिसांना मिळाली होती. सांगली पोलिसांनी तपासाची चक्र तात्काळ वेगाने फिरवून केलेल्या या यशस्वी तपासाबद्दल त्यांचं कौतुक होत आहे.