मिळालेल्या माहितीनुसार जावळे गावात भाड्याच्या घरात राहणाऱ्या एकाच कुटुंबातील पाच जण बेशुद्ध अवस्थेत सापडले. या पाचही जणांनी चहामधून विषारी द्रव्य पिऊन आत्महत्या करण्याचा प्रयत्न केल्याचे पोलिसांच्या प्राथमिक तपासात समोर आले आहे. या घटनेतील एका तरुणाचा मृत्यू झाला आहे. मूळचे नेपाळी असणारे हे एकाच कुटूंबातील सदस्य जावळे गावात अनेक दिवसांपासून राहत होते. मागील दोन ते तीन दिवसापासून त्यांच्या घराचा दरवाजा उघडण्यात आला नव्हता. त्यामुळे शेजारच्यांना काहीतरी घडल्याचा संशय आला. त्यांनी यासंबंधींची माहिती अग्निशमन दल आणि पोलिसांना माहिती दिली. सुरक्षा यंत्रणा तेथे पाचारण झाली. सूरक्षा यंत्रणेच्या जवानांनी घराचा दरवाजा उघडला. त्यावेळी त्यांना कुटुंबातील पाचही जण बेशुद्ध अवस्थेत आढळले होते.

सुरक्षा यत्रणेतील जवानांनी तातडीने या सर्वांना उपचारासाठी पनवेल येथील नानासाहेब धर्माधिकारी उपजिल्हा रुग्णालयात दाखल केले. त्या कुटुंबातील 22 वर्षीय संतोष बिरा लूहार याचा मृत्यू झाल्याचे डॉक्टरांनी सांगितले. तसेच बेशुद्ध व्यक्तींमध्ये 23 वर्षीय रमेश बिरा लोहार, त्यांची पत्नी बसंती व पाच वर्षांचा मुलगा आयुष आणि दोन वर्षांचा आर्यन हे सुद्धा बेशुद्ध असल्याने त्यांच्यावर रुग्णालयात उपचार सुरू झाले. अतिदक्षता विभागाची गरज असल्याने या चौघांना पुढील उपचारासाठी नवी मुंबई येथील रुग्णालयात हलविण्यात आले आहे. यातील दोन लहान मुलांची प्रकृती स्थिर असून आत्महत्येचे नेमके कारण अद्याप समजले नसल्याची पोलिसांनी दिली. पोलिस घटनेचा तपास करत आहेत.